SIEMPRE PIERDO

Dexo que la ruleta xire y la bola

caiga en numberos que nun tengo,

que nun xuego,

porque pierdo davezu,

porque soi probe de suerte

y d’esperanza nun futuru.

Salgo del casín etenru de la vida

con tastu a que namái ganen ellos,

los qu’enxamás nun dexen

d’echate la zancanía,

de rise de la probitú na que vivo,

y colo al par la mar a faceme

fola,

a cariñar el sable en suaños d’espluma.

Torno a casa, al llar, al marmurar del

silenciu,

chuco na cama la dulda y

miro

pal espeyu que me reflexa,

y digo:

siempre me toquen les negres,

siempre pierdo.

 .

CIRCU

¡Non, nun lo dulden!

Vengan al circu onde los payasos

caten a les vaques casines

con guantes de pexiglás,

los trapecistes baxen a la mina

en cañiqueros d’alabastru

allá onde’l grisú encha la fe,

los magos executen los trucos

dende la Xunta Xeneral del Principáu

dexando a la xente col bolsillu vacíu…

¡Esto ye circu,

                puru circu!

El circu Asturies,

col espectáculo Crisis Etenro,

complazse en convidalos a asistir

a la función más revolucionaria.

Ente los presentes sortearánse

carrapotaes de puestos trabayu

lloñe la tierrina amada,

lloñe la familia proteutora,

onde’l capitalista-yos seya a esplotar.

.

NAGUO POR ESCRIBITE

Naguo por escribite lletres

en flores etenres d’amor,

que t’abran les persianes

al alborecer del cielu,

que te compongan sones seles

onde te bese candial los güeyos,

t’acaríñe con dulzor el sexu

hasta que les fueyes chisquen

los llíquidos del querer.

Naguo por escribite lletres

en suaños máxicos de tenrura,

en sábanes goliendo a ti,

a sudu d’amorosar na nueche,

onde la penetración nos xunte

nun abrazu d’espelma vivo,

d’un gocie que nos inunde

los sentimientos l’alma.

Naguo por ser tuyu,

tenete garráu pelos raigones

y que chirlotes la esperanza.

.

LA ETENRA DULDA

Hebio abondes presiones a los veceros del café de padre pa que nun fueren a gastá-y nin una perra chica. Na fabrica les amenaces de despidu sonaron al altu la lleva, tampoco nun se ficieron esperar les insinuaciones a la xente de que podíen tener de devolver los dineros emprestaos pol Duque de Santurrasua, hasta-y remembraron a los bancos el llugar ú salíen los capitales del pueblu, y too pa depués suxerir a la oreya que si diben a la cafetería del parque sabríen lo que yera buenu. Pero cuantes más presiones, más clientes diben, taben fartos del caciquismu, veníen hasta de la capital a ver la revolución pacífico d’un pueblu. El duque rabiaba y los habitantes esfrutaben d’ello y pensaben en nueves engataes.

Padre entamó a refrescar pola neña que lu aidaba en café y facía-y tolos enredos que-y ficieren falta. El cura soltó en misa sobre les muyeres que vivíen en pecáu, refiriéndose a la neña, y los habitantes dexaron de pasar pela ilesia en pagu a tantu desvelu. Enxamás nun ocurriere cosa tala, el cura diciendo namái misa pal duque y el so cortexu, nin les beates s’atrevíen a romper el boicot.

Un domingu na mañana, cuando toos diben al café en cuentes d’a misa, la neña nun apaeció. Llamáronla al móvil y al teléfono fixu ensin llograr rempuesta. Una caterma veceros ficieron un viacrucis al pisu onde vivía la mocina, nun atopándola poro que s’esmolecieron muncho.

Pasaron los díes y la rapaza nun dio señales de vida. Mio padre pegó cartelos de búsqueda de la moza y el restu la xente repartiólos pela rodiada. Cada veceru qu’entraba en café siempre-y dicía lo mesmo al probe proxenitor de mio, sábese dalgo. La rempuesta yera un baxar la cabeza y dexar escapar dalguna llárima.

Entamóse una manifestación hasta’l cuartelón la Guardia Civil pidiendo que se ficiere una búsqueda curioso. El silenciu los picoletos enraxonó a los vecinos, arrodiaron el llugar y prometiéron-yos nun movese hasta que-yos cuntaren la verdá. Duraron dos díes ensin abrir boca, pero al terceru nun pararon de falar. El duque mandára-yos llibrase d’ella. La orde llegó-yos al travies de mandos capitalinos y nun tuvieron más aquello qu’obedecer. Fueron a casa la neña y amenazáronla con encarcelar a padre con cargos serios si nun colaba del pueblu pal estranxeru. La moza fizo la maleta nel intre y fuxó a tou meter.

Los trabayadores de palaciu entamaron una fuelga por mor del caciquismu del duque y la coaición a la neña pa que colare. Prendiéronse dellos fueos pelos xardinos de palaciu y na fábrica españaron dellos artefautos. El duque aseguró que nun sabía onde se metiere la mocina, que s’escondiere mui bien y nun yera a dar con ella. Dende entós, a cada poco miraba a los llaos nun fueren face-y un atentáu. Vivió’l restu los díes de la so vida cola etenra dulda de la muerta a la vuelta la esquina.

...

MIO PADRE Y LA CIA

(Fabia cuntada por Polo)

Mio padre trabayaba na CIA de Fabia, taba a les ordes del duque de Santurrasu y espiaba a los paseantes que diben ente’l barriu probe y l’apeaderu’l tren. Por esi trabayu sufría doble rechazu: el de los otros habitantes y el d’él mesmu, cansu como taba de los ricachones a los que nun-yos valía con tener toles perres del mundiu, tamién teníen de controlar a los vasallos.

Un día, de la que xixilaba a los vecinos más cafiantes pa los señores, crucióse-y una rapacina que-y remembró les dómines en que taba n’escuela. Dexó de pensar nel llabor que-y axudicaren en palaciu y dedicóse a siguir aquella neña maraviosa na qu’entamó a suañar día y nueche. Cruciábase per onde ella solía dir y ufiertába-y una sonrisa; la contestación de la neña nun se dexaba esperar nin un segundu: mirábalu, chisgába-y el güeyu esquierdu y llanzába-y un chuchín al aire. A él xubíase-y tolos colores a la cara y fuxía como un condenáu.

En palaciu echáronlu por vagu y tuvo de colar del pueblu. Cerca dos años naide nun supo d’él, cuidaron que marchare a conquistar mundiu, a llibrase del dominiu los señores duques. De sópitu, morrió un ricachu la ciudá que tenía otru palaciu en pueblu y dexo n’herencia pa los vecinos probes de Fabia los tarrenos que taben al otru llau del ríu, nel llau probe. Yeren unos xardinos ingleses mui afayadizos que teníen una casina de cristal onde se punxo una anuncia na que figuraba que se diba abrir una cafetería nellos. Nun se dexó de marmurar de quién diba encargase del negociu, namái se víen obreros y repartidores pero naide d’importancia qu’ocupare un puestu de tanta responsabilidá.

Un domingu, tres la misa, apaecieron cartelos convidando a toles persones a tomar un daqué na nueva cafetería. Los duques encabezaron el desfile hasta’l parque, pero al llegar a la cafetería vieron a mio padre al cargu d’ella y ordenaron nun entrar al restu’l pueblu. La neña desobedeció lo deseyáu polos señores feudales y entró, arremangóse y púnxose tres la barra a aidar a padre. Esi domingu conoceráse como’l de la primera sublevación, la xente siguió a la neña y l’ésitu fo total. Los duques tovía tienen el vezu d’intentar estrozar el parque, pero padre, que trabayó pal ricachu la ciudá, llograre una cláusula de por vida pa que la cafetería tuviere a nome la familia.

Si entá nun ties la novelina Fabia pues atopala na editorial Trabe.

..

FABIA CUNTADA POR POLO

De neñu la pallabra coche emplegábase namái en palaciu y en dalgún xalé del llau ricu de Fabia, el llau que taba al par la ilesia. Toes eses viviendes teníen xófer y una carretera meyor a esgaya que les víes del tren nel que viaxábemos la mayoría los habitantes del pueblu. ¡Qué dómines aquelles! El feudalismu entá taba presente en plenu sieglu XX. ¡Qué digo! Tovía nel XXI tenemos figures de la Edá Media.

Daquella, los sábados y domingos díbemos a pasiar del llau probe la población al apeaderu del tren. Acompañábemos a los vecinos que diben viaxar a la ciudá pa despedilos y saludar a tolos que llegaben de vuelta. Yera un ritual que nos xuntaba como pueblu y nos separtaba como seres humanos avezaos a la envidia. Sabedor d’ello el señor duque de Santurrasu, unviaba a los sos criaos a espiar tolo que se falaba como si fueren axentes de la CIA. Ente les verdaes que pillaben, metíamos-yos más mentires qu’otra cosa.

Remembro la más afayadiza de toles engataes que-yos gastamos. Marmuramos ente nos que los trabayadores la fábrica sacaben al traviés del tren centenares de pastilles que comercializaben ente’l contrabandu la ciudá. El señor feudal, qu’entós yera’l padre de doña Mercé, nun yera a permitir aquello, quita-y ganancies a la familia dueña del pueblu, eso nun lo yera a permitir. Avisó a la policía que fizo redaes pel tren ensin suerte dala. El señor duque enraxonóse muncho de que-y tomáremos el pelo, pero la fía anotó’l fechu y llevó la idea p’alantre col que depués fo’l so maríu, Xilu Anzu. El contrabando pastilles diba ser la mayor ganancia de la mafia feudal.

Sí, anque nós sacábemos punta a too, ellos de dalguna manera siempre teníen de ganar dineru de too. Ye la maldición los probes, anque de les veces engáñennos llamándonos clas media. Sí, d’eso tamién sacaron, saquen y sacaran capital que los fizo, fae y faerá más ricos a costa nós.

Aconséyovos lleer la novelina Fabia na editorial Trabe, sedréis a pescanciar meyor les histories de Polo sobre'l pueblu.

.

CUÉLEBRE

Mar cuayao,            destierru de Cuélebres,

agües de corazón xeláu

qu’arrampuñáis les migayes

de lo qu’un día foron  abondoses ayalgues,

dexái que les ales de serpiente

tornen espardise pela tierra los astures,

que de nueves ruxan les escames

qu’arguyoses glayen el soníu d’un pueblu.

Mar cuayao        , caxa fuerte d’impuestos,

estrozadora del valir de les ayalgues

del saber astur,           de la llingua los Cuélebres,

cuantes más cargues impositives nos impongas

más llibres volaremos tres los vieyos Cuélebres

que nos guíen a les tierres verdes d’esperanza,

a la oficialidá de ser astur, cuélebre,   tierra,         corazón,

llingua de soníos en llibertá.

Collacie/os, los proyeutos de futuru escribiendo llévenme a facer d'esti blog dalgo qu'apaecera ensin periocidá dala. Tres, tres son los proyeutos nos que tare somorguiáu y que me van impedir siguir espublizando dos veces al mes el blog. Sicasí, si me queréis lleer de contino, voi continuar en  https://www.facebook.com/nelmoran , ehí atoparéis los escritos davezu. Hasta la prosima espublización, ta llueu.

.

POESÍA MUDA

Pallabres,

silenciu de pallabres

                   qu’escuenden

soníos dondos,

                            soníos de tecles invisibles,

                            soníos d’almes mosties

                                               nuna vida tresmontana.

Pallabres,

                                      d’airones qu’escuerren al mundiu,

                            de planetes que dibuxen xestos murnios,

                   de pantasmes que xiblen llárimes alloriantes,

         de suaños que s’esmucen en sábanes sangrientes,

d’almes qu’esnalen penriba la vida de les boques zarraes.

Pallabres

         ensin vida suplicante,

         ensin futuru revieyu,

         ensin mieu a la desesperación,

         ensin muerte de la esistencia.

Pallabres

         d’una poesía muda.

        

El 18 de febreru tornaré a espublizar nel blog NON l'entamu d'una coleición de poesíes al rodiu la mitoloxía; la primera entitúlase Cuélebre y espero que vos preste. Hasta entós, ta llueu.

.

AMNESIA INTERESAO

Nun soi a entendelo. Quiciabes seya pol enfile qu’arrastro. El casu ye que taba tou gayoleru vaciando botella a botella de xampán, coles mios amiguines davezu, cuando entró una paisana toa de negru con cuatro neños, ún d’ellos en cuellu, y empobinó pa min. Les camareres de la barra llamaron toes enraxonaes a los matones pa qu’echaren aquella recua darréu. ¡Namái faltaba que llegare la policía y atopare a menores dientro! La paisana engarróse colos matones demientres me glayaba:

-¡Castrón de mierda! ¿Nun quedrás que los neñós pasen la nueche conmigo, la so tía, nun día tan murniu pa toos?

Miréme y vi que tamién llevaba un traxe prietu, como de llutu, y, pa enriba, la cara d’aquellos neños sonábame muncho. Bueno, nun me voi rucar el tarru, seguru que mañana, cuando me quite la resaca, voi decatame de lo que pasó. ¡Otra de xampán, Irina!

El 4 de febreru de 2019 tornará con toos vós  el blog NON con un poema entitulau Poesía Muda. Xineru sedrá un mes de descansu pa en febreru poner la toxina botulínica que m'alixere les secueles del derrame celebral. Hasta entós, alón.

.

A DESTIEMPU

Les llárimes d’ausencia apenzaron a echala de menos malpenes ella me dexó solu na Tierra, ensin ser a siguila a un mundiu desconocíu, a sentila al par de mio por más tiempu; dos díes depués de la so desapaición continuaben a llorar dientro min los sentimientos a ella. Un pingar sele de tierra esparramábase pente la fuxaca y el mio celebru. Una soledá arrodiada de xente inundaba los silencios rotos del mio alma; los fíos, que me remembraben de contino lo vieyu que yera, acariñaben con frialdá’l mio llombu; el cura facía la señal de la cruz a la tarxeta bancaria; y l’enterrador tapábeme los recuerdos palada a palada. Una retafila de convencimientos sociales desfilaron delantre min dándome la mano y acompañándome nun sentimientu escoso.

Un disparu inesistente abrió la carerrera p’hacia los coches. El fíu mayor garróme en volanderes, rezando pa que naide nun se cruciare nel camín y fuere a llibrase de min nun santiamén. Les prieses en meteme dientro l’automóvil ficieron que me cayeren les gafes en suelu y se m’estrozaren los cristales. Un qué desastre yes salió-y de la boca qu’allampiába posame darréu y nun s’alcordar de min en tiempu. La velocidá lloco cola que conduxo enseñóme la casa onde yo vivía, pasando a tou meter al par d’ella ensin dame la posibilidá d’apeame. Un ónde me lleves salióme represo. Qué coño t’importa, espetóme con odiu na voz. Nun me perdonaba que nun-y dexáremos les perres pa dar la entrada d’un xalé col que fardar delantre los amigonos; si supiere que fo so madre quien se negó dafechu en dexá-yles; siempre pensaren que yo yera’l que me negaba a da-yos los caprichinos, pero non, qu’enquivocaos taben; agora qu’ella taba muerta nun diba sacalos del erru. Pasaron cais, aveníes, praos y, de sópitu, lleguemos a un pueblu chicu con una casa descomanada no fondero; yo conocía esi caserón de sobres; yera l’aparcamientu persones al que yo llevare a mio padre había años; enantes de trayelo a ella charre con él, non como los cobardes de los mios fíos que lo ficieren a lo zorrampliu. Un mañana traigote les gafes fo la única comunicación que tuve col mio verdugu. Miré pa dientro y namái aldovinaba a vieyos caminar a nenyures ente la borrina d’ausencia de les gafes.

Una vez ficháu ya instaláu, aparcáronme nun salón con golor a desinfectante pa vieyos. Los bultos glayaben y riíen como si fuere l’últimu día que lo diben poder facer. Lloré y lloré ensin que dengún se preocupare de la mio persona. Ente’l marabayu de persones mal apetiguñaes, dalguién en siella ruedes nun paraba d’esparavanear desaxerao p’hacia min. Pola voz saqué que yera muyer y que pronunciaba de contino’l mio nome. De xuru yera la lloca’l llugar con un Colás de maríu. Sicasi, la melodía del so tonu remembróme a Charín, Charín Payares, la moza más melguera qu’había en pueblu. Rondéla meses y meses hasta convertila nel mio refrescu oficial. Nun tuve arguyosu nin nada cuando la paseaba del brazu pela plaza mayor de la llocalidá y la convidaba merendar na confitería d’al par del quioscu la música. L’abandonu de lo rural polo urbán separtónos del futuru, ella fo pa la ciudá d’interior y yo pa la de costa. Sólo’l branu nos autorizaba a venos, dambos lluchábemos coles pareyes pa baxar a la playa na escalera que sabíemos nuestra. Home Colasín, Charín cielu, que casualidaes tien la vida, nin que lo digas…, siempre’l mesmu ritual, les mesmes rises, la mesma fermosura de cara. Tolos años nos pasábemos les señes y los númberos de móviles col aquello de visitanos, de comer xuntes les families, pero la vida púnxose a destiempu de dambos, alloñábanos ensin remediu, fiu a fíu, nietu a nietu, esperanza a esperanza. Hasta que la vieyera nun nos llevó más a la playa y les alcordances tuve de llevales en silenciu.

La muyer púnxoseme delicadina, namái salíemos al medicu y pa casa. Un día sonóme’l móvil, yera Charín, dicíame qu’abandonare al maríu, que nun yera a tar con él y pensar en min tol tiempu. Too se nos torcía, tuve de desplica-y que yera mal momentu, que la mio muyer tenía una enfermedá grave, que nun yeren a echa-y el tiempu que diba durar. Ella sintiólo muncho, dixo que sí, que tenía de tar al llau d’ella, que yá nos veríemos. La enfermedá fo llarga, llaméla una vuelta y otra pa desafogar, ella siempre tuvo bones pallabres, hasta que naide nun me contesto, el númberu taba desconectáu o fuera cobertura. Aguanté les llárimes nueche a nueche, non pola enferma que m’insultaba y dicia que yera un pazguatu, sinón por Charín, por una vida a destiempu, por un amor non consumáu.

Un celador entróme en bañu y punxo roxu al mio pudor. Esvocexó como si tuviere sordu que me dexaba les gafes enriba’l llavabu, que me les truxeren por mensaxeru. Llogré tapar les vergüences y salir de la ducha cuando yá marchare l’intrusu. Pasóme pela cabeza que nun pagaba la pena siguir nesta vida, que tenía de ser fríu y trazar un plan qu’acabare con aquella aborrición d’esistencia. Una mocina anduvo pelos cuartos avisándonos que baxáremos al comedor a almorzar. Nun tenía fuerces nin pa negame, coloquéme na mesa de la nueche anterior y el vecín de siella apurrióme un papel. Lleílo, yera daquella muyer de la nueche anterior, escribía que nun fuere testerón y la mirare; por favor, que nun mandare a otru celador pa ordena-y que nun se m’aprosimare. Busquéla cola mirada, siguía a saludame. Y entós, y sólo entós, decatéme de quién yera, les gafes descubríeronmela, Charín, la moza más melguera de tola residencia vieyos. A la fin el tiempu s’acompasare y dexábanos ser felices.

El 17 d'avientu tornaremos a tar con toos vós equí, nel Blog NON, con un microrrellatu entituláu Amnesia Interesao, ye puru humor cruel (tan afayadizu pa estes feches navidiegues). Hasta entós, ta llueu.

.

RUTINA

Llevantase

         a la lluz que s’escuende tres una mirada gacha,

         al silenciu qu’amiya de les pallabres roceanes,

y esllagañar la voluntá de los suaños dormíos.

Duchase

         col agua que mueya los suspiros arrechos d’esencia,

         col xel que llimpia los rancores nacíos en tierra esclavo,

y secar los sentimientos cola toballa de la esperanza.

Vistise

         cola ropa qu’esparde l’arume de la esistencia esguiloso,

         cola piel qu’ornia la eternidá de color dondu,

y mirar a los espeyos de la verdá asoliviada.

Llimpiase, duchase, vistise,…

pero yá pa siempre

ensin

                            ti.

El blog NON tornará con toos vos el 3 d'avientu. Hasta entós, ta llueu.

.

L’EMBAXADOR NOVATU

Nun quedría que me vieres con esti traxe ridículu col que nos faen vistir el día que tenemos de presentar credenciales. Échote en falta, prestaríame que tuvieres nestos momentos tan delicaos pa min. Cuando me falaren del gran sacrificiu que teníemos de facer los embaxadores pola patria pensé que desaxeraben. Facer requilorios a xente fato qu’arrampuñen a fartar al pueblu considéralo una babayada. Falar col rei y la reina ensin presencia los asesores nada que nun faiga una parvulista. Imaxínate la reina sirviéndome un platu de canapés de la que me soltaba de memoria la importancia de la pintura barroca nel nuesu país. Fo como estar dientro un documental con llocutora tatexa. Y les miraes que m’echaba; nun dexaba de soltar suspirinos y garrame les manes; y les rises nervioses que me dedicaba; pero eso nun fue lo peor, cuando pensé tar llibre d’ella y colar pa otru grupín, noté que me raspiaben el culu y me lu primíen; di la vuelta y miréla; taba a charrar con otru embaxador, repitiendo la xugada; arremellé los güeyos y busqué la fonte d’aquel tocamientu; entós vi al rei mirame con güeyinos deseosos. Y creeme cuando te digo que les cames reales son un migayín dures.

El 19 de payares espublizaráse de nueves esti blog; hasta entós, ta llueu.

.

CONFESIÓN

Anicio’l ritual. A un avemaria purísima síguilu un ensin pecáu concebida. El pazguatu de min nun lu miró a los güeyos, como si fuere l’unicu que cometiere pecáu. D’una sentada solté-y que realizare l’actu sexual fuera’l matrimoniu. Mantiénse calláu. Quiero que fale, qu’amose anoxu. Mírame ensin reprochame nada. Con un home, chinchélu. Pero yá nun siento nada por él, marmuré. Tienes dalgo más que confesar, fo la única rempuesta que me dio. Non, padre. Mándame rezar dos Creos y eso ye precisamente lo que-y quería dicir, que yá nun creo, que perdiere dafechu la fe nél. Intento colar d’ellí, fuxir, y él gárrame fuerte la mano. Avera la boca a la de mio. Retírola de la suya. Persíguela. Cedo.

De nada sirvió la confesión.

El 5 de payares tornará con toos vos el blog NON espublizando'l microrrellatu entituláu A Destiempu. Hasta entós, ta llueu.

.

ALCORDANZA A GÜELOS

Cada vez qu’abro’l coche esparrámase l’aire nordés enlleno d’esi golor a xaranzana que me remembra los branos en casa los güelos. Foron tiempos d’amor y sapiencia que percorren cada requexu del mio celebru. Daquella, unos padres de cariñu recateru preparábenme les maletes de la que planeaben allegres los díes ensin neñu. El sentimientu yera mutuu, tolo hai de dicir, a min tamién se me facíen eternos los díes con ellos, allampiando marchar pa onde se me quería. Cada curva, cada reuta, desixíen rápido otres y otres; al llegar, les voces de los güelitos sacábenme de la velea de reñes paternes ensin xacíu. Salía del coche escopetáu a abrazalos y ellos enllenábenme de besos qu’escaecíen aquellos meses perdíos de rises y cariñu l’alma.

El tubu escape los tránsfugues paternos ruxía enrabietáu demientres güelitu, el rei de les pallabres, recitaba sele aquel poema qu’escribiere’l primer día que yo pisare aquella casa. Güelita, la reina los colores, amosábame’l cuadru que pintare con tolos sentimientos que percibiere al mio rodiu. Ellos coyíenme les maletes, yo´l cuadru y les pallabres, entrábemos en silenciu, escuchando les pisaes de la compaña. Les escaleres llevábennos al cuartu onde díbemos esfacer les maletes del olvidu de la infelicidá. Otru añu más les ventanes dexaben entrar esi nordés que nos xuntaba.

El sol de les mañanes asomábase enllenu maxa, esa maxa que facía sieglos se perdiere na ciudá. El xiblar del cantu los Payares, himnu de los branos familiares daveres, avisábame que’l güelu taba a preparar l’almuerzu; al poco xuntábase amorosiego’l soníu los llabios mio güela que yera atapáu de xemes en cuando polos silencios de la taza café; yo baxaba de dos en dos los pasos de la escalera y entamaba a entonar la lletra la canción. Cuando finábemos la llacuada mañanera, güelitu poníase a prepar los bocadillos pa la playa, güelita acuriosaba la bolsa colos traxebaños, toballes y demás aperios y yo xixilaba cuciu la llegada los pirates de la casa d’arriba. De mano oyía como les pisaes bucaneres s’averaben a la proba del barcu; rápido sacaba los prismáticos y siguía’l caminar de les pates de palu; finaba llanzando’l glayíu de que díbemos ser abordaos d’un momentu a otru. Tres la entrada al xardín por parte los pirates vecinos, celebrábemos l’alcuentru cola danza de la tripulación Pates de Palu Colloraes. Güelitu poníase’l garfiu de plásticu y entonaba’l Llimón, Llimón, Llimón, la Botella Llimón. Nel camín a la playa organizábemos abordaxes a tolo que se movía. En llegando a destín, nun perdíemos nin un segundu n’entrar nel agua, nun saliendo d’ella namái que pa xintar o esplorar la rodiada en busca de pirates enemigos.

Aquel añu dalgo vieno a fadiar a los pirates l’allegría, una familia d’estiraos aterrizó a veranear en pueblu. Tan aforfugantes veraneantes teníen un fíu de la nuesa edá que nos escoyó como voluntarios a ser cafiaos. Averábase a nós y soltaba con tola pachorra el qué pasa chicos, a qué estáis jugando, no os parece mejor idea… Al dici-y que non, entamaba a berrar como si fuere un nenu cuna con fame. Los padres, siempre atentos a aquel llimiagu lladín, soltaben la reña p’hacia les nueses persones.

-Anda Xabelín, xuega col neñu, fáelo por min –dicíame sele la probe güelita a sabiendes que güelitu diba compensámelo una vez en casa.

Cuando entrábemos n’agua col aquello de nalar hasta perder l’aliendu y nun facer pie, unes berríes procedentes del fatu y dañín rapaz ordenábanos que paráremos o que diba cuntá-yoslo a los mayores. Un día sacónos de quiciu tanto que lu garramos por piernes y manes y apenzamos a metelu en profundidaes non esploraes. Desiguida decatámonos que malpenes sabía nalar, que los padres aínda sabíen menos y que los socorristes, cuando s’enfocicaben, yeren mui malos enemigos. Sicasí, fo manu santu, nun s’averó a nós nin anque regaláremos coleiciones de cromos. De nueves se llevantó la veda pirata y tornó la folixa a la playa.

Al mediar la tarde, tornábemos a casa con ganes d’oyer de nueves el reló de parede que guardaba’l tiempu na nuesa ausencia. Tomábemos una pieza fruta y sentábemos, güelu y yo, nel paraísu la lliteratura: yo a rellatar cuentos maraviosos y él a recitar pallabres vives. Güela diba pal cuartu’l color, al llau del de les lletres, escoyía la tonalidá pal pincel y esvariaba los sentimientos pel llenzu. Prestábame zarrar los güeyos pa buscar la inspiración; facer chasquíos de boca pa espertar a la goma y que borrare les metedures de pata; o escribir los suaños de vida aventurera pa que güelito s’asombrare.  Sentía que pertenecía a esi llar onde l’amor nun se vía atuñáu sinon que se repartía pelos corazones necesitaos. De xemes en cuando arreába-y un coldazu a güelitu p’amosa-y la cabera ocurrencia. Ríase con dulzor y aconseyábame correxir hasta la perfeición de la que me daba un chuchu d’afirmación.

Aquella tarde pidí-y que nun me ficiere denguna correición, qu’intentaría autocorrexime yo y enseña-ylo al final. Noté que crecía en cada pallabra, coma o aición que cambiaba; el puntu y final pillóme arreglando lo cabero. Enseñé-ylo a güelitu que lo garró como acariñando les idees. Al devolvémelo, clisé, malpenes tenía señalaes dos o tres zones a revisar; mandóme iguar lo que me punxere a color y diome un chuchu que me supo a gloria. Él quedóse pigazando un migayín demientres yo trabayaba. Tasquéme la chola, primí la llingua colos llabios, arremellé los güeyos y sonrii a cada vez que solucionaba un problema; nun duldé qu’aquel testu diba ser el primeru que me publicaríen.

Al finar l’escritu, l’aire nordés retiróse y un orbayu constante dexóse sentir.

-Güelitu, güelitu, acabé. Güelitu…

El reló de parede detuvo’l tiempu. El páxaru pintu que cantaba cada vez que pasaba una hora quedó mudu pa siempre.

Vémonos el llunes 15 d'ochobre con un microrrellatu entituláu Confesión. Hasta entós, ta llueu.




.

SÚPLICA

Eternu marmurar de fueyes

d’un árbol ensuchu d’amor,

dexa que los airones de sentimientos

faigan sonar el teléfonu la vida

y amataguen la dominancia

de la voz del silenciu.

Necesito vacaciones porque toi a escribir una novela y la cabeza necesita tol tiempu pa ella. Tornaré de nueves p'hacia ochobre o payares. Hasta entós, que seyáis felices.

.

DESÉU

Yá sé que nun me van creyer. Entiéndolos. Yo tampoco lo faería. Si hasta’l trabayu que tengo suena a xirigonza. Soi la emplegada de Payares&Cia Anticuarios, una tienda qu’hasta l’uniforme ye del sieglo XVIII y los veceros asemeyen tar sacaos d’una novela picaresca, siempre sollertes a prauticar la engañifa con cualquier dependiente qu’intente sacar los pies del renacimientu. Panorama qu’amosa tolos ingredientes necesarios pa facer de la mentira un arte.

Too apenzó una tarde de troníu esaxeráu y lluz mortecín. Naide nun s’atrevía n’entrar naquella república de les falsificaciones. Aprovechábemos el tiempu catalogando toles falcatrúes que nos espetaren nos últimos díes. Tando yo con una baraxa del tarót, alcontréme con una carta de la muerte que m’abultaba viva. Los güeyos apeguñábenseme a aquel naipe cuando noté que dalguién se m’averaba. Di un blincu alloriante en cuantes me tocó. Tenía cara d’androide y los deos esturnios movíalos col ritmu d’un robó. En suelu posare un oxetu tapáu con tela polvoriento. Miréla y remiréla ensin ser asitiala en denguna época la historia. Una voz d’ultratumba impúsome dir buscar al que tuviere al frente d’aquel llugar. Nun fui nin a moveme, un glayíu silenciosu llamó al señor Payares. En llegando’l xefe, ella llevantó los brazos con sen amenazador, a lo qu’él gachó l’arguyu, desatapó l’oxetu y llimpiólu de mugre de bien d’años. Tres bones frotaes, la figura d’un espeyu dexonos hipnotizaos. Avezáu como taba siempre a mandar, xubió a regañines aquella ayalga, arremelló los güeyos casi hasta dar col techu y dixo que, pol estilu, aquel espeyu yera del imperiu austro-húngaru. La muyer nun taba por falar muncho y díxo-y un preciu. El señor Payares recatió’l valor l’antigüedá pero ella nun gorgutó y tornó envolvela col trapu. El xefe garróla pel coldu pa detener la so marcha y soltóla como si-y diere la llétrica. Ella mirólu con cara ascu y repitió la cantidá que tenía de da-y si quería aquella ayalga. Él sacó la chequera y pagó-y como dios manda. Ella marchó como llegó, ensin que naide nos diéremos cuenta.

El señor Payares llevó aquella conquista austro-húngara hasta’l despachu de so. Siguílu como colexala obediente y zarre la puerta. Apurrióme productos de llimpieza pa que-y mantuviere rellimpiu l’espeyu y fízome promete-y que nun lo diba dicir ente los compañeros. Sentí qu’aquel secretu nun yera denguna obligación pa min. Salí con ganes de volver too darréu a espeyame naquella lluna divina, pero fo’l xefe quien se quedó con él. Eso púnxome mui celosa.

Los díes enllenáronseme de deséu lloco y nun pisaba la casa al nun ser que fuere pa dormir. Salía del trabayu y diba degolando d’una tienda a otra, d’un chigre a otru, d’una plaza a otra, …, cualquier sitiu me sirvía con tal de que tuviere cerquina d’aquella ayalga ausente, d’aquella necesidá de reflexar la esperanza de ser querida. Sentíalu tan cerca y tan lloñe a la vez, arrodiáu polos brazos, polos besos, pol roce del señor Payares y poníame de los nervios. Alternaba los suaños de ser a tocalu con pensamientos de desfaceme d’aquel xontrón que lu acaparaba. Namái naquellos minutucos diarios que lu llimpiaba aselábame l’alma y l’espíritu asemeyaba ser más y más mozu. Cada vez que pasaba d’un llau a otru’l trapu, vía como se me diba una agurria de la cara anque se tornare nuna mancadura nel corazón. Les llárimes remocicábenme la ropa; los xemíos peñábenme’l pelo y tornábenme los rizos de neña; el dolor interior calzábame como una yogurina. Por embargo, tengo de dicir, el xefe envieyaba a cada segundu que pasaba al par d’él. Eso facía que la venganza se retrasare na mio cabeza.

Una mañana llegué a la tienda y vi una ambulancia na so entrada. Glayíos y sollutos salíen de dientro ensin cesar. Dos enfermeros sacaben al señor Payares en parigüeles. Tenía cara d’androide y los deos esturnios movíalos col ritmu d’un robó. Semeyábase neto a la muyer que truxere l’espeyu. El despachu taba zarráu dafechu con llave y un respingu percorrióme la rabadiella.

Tuvo de pasar una selmana pa que me llamare’l xefe dende l’hospital. Di coles pates en culu na esperanza de que m’apurriere les llaves del despachu. Esbabayó y esbabayó al rodiu lo peligrosu que yera l’espeyu. Encamentóme que lu tirare nun basureru que tuviere lo más lloñe del ser humán. Diome les llaves y díxome que me garrare un mes o dos de descansu, que me diba facer falta depués del esfuerzu a realizar. Mirélu con cara melandru desconfiáu, a sabiendes que marcharía escopetada a xuntame al mio amor y que lu diba llevar pa casa.

Los díes trescurrieron nun infiernu pacetible. El deséu trespasóse de min a él. Nun almitía que me moviere del so llau. Les agurries tornaron de nueves a la mio cara. Esporpollaron y esporpollaron nel cuerpu y nel celebru, nel alma y nel corazón, nes esperances y nes penes. Sentíme esclava. La voz nun yera a salir de dientro min. Picaron a la puerta. Sonó’l teléfonu. Nun contesté a naide. Temí pola mio vida.

Una mañana de troniu esaxeráu y lluz mortecín fui a tira-y un trapu vieyu enriba él. Vistíme colo primero qu’atope. Baxe a toa mecha ensin ser a decatame del pesu del fuin. Púnxelu nel asientu traseru y conduxe hasta llegar a la cuidá más llonxana que me dio la gasolina. Al entrar na tienda d’antigüedaes a la que fui nadie nun taba atento a los clientes. Piqué-y nel llombu a una dependienta que taba esaminando una baraxa del tarot. Dio un blincu como si viere a un diañu. Ordené-y que llamare al que dirixere too aquello. Una vocina de pita pronunció un nome. Entós, y sólo entós, vi la carta de la muerte y supe que nun diba ser la última vez que vería al austro-húngaru.

El 7 mayu tornaremos otra vuelta a espublizar nel blog una poesía entitulada Súplica. Hasta entós, tenéis dos cites pergrandes cola Llingua Asturiana: el 21 d'abril a les 12 del meudía de la Estación na cai Uria d'Uvieu sal una manifestación pola Oficialidá y el 4 mayu celébrase el Día de les Lletres Asturianes cola manifestación y l'actu de la Academia de la Llingua Asturiana. Nun faltéis a denguna d'eses cites, la Llingua Asturiana merezlo. Vémonos.



.