SIEMPRE PIERDO

Dexo que la ruleta xire y la bola

caiga en numberos que nun tengo,

que nun xuego,

porque pierdo davezu,

porque soi probe de suerte

y d’esperanza nun futuru.

Salgo del casín etenru de la vida

con tastu a que namái ganen ellos,

los qu’enxamás nun dexen

d’echate la zancanía,

de rise de la probitú na que vivo,

y colo al par la mar a faceme

fola,

a cariñar el sable en suaños d’espluma.

Torno a casa, al llar, al marmurar del

silenciu,

chuco na cama la dulda y

miro

pal espeyu que me reflexa,

y digo:

siempre me toquen les negres,

siempre pierdo.

 .

CIRCU

¡Non, nun lo dulden!

Vengan al circu onde los payasos

caten a les vaques casines

con guantes de pexiglás,

los trapecistes baxen a la mina

en cañiqueros d’alabastru

allá onde’l grisú encha la fe,

los magos executen los trucos

dende la Xunta Xeneral del Principáu

dexando a la xente col bolsillu vacíu…

¡Esto ye circu,

                puru circu!

El circu Asturies,

col espectáculo Crisis Etenro,

complazse en convidalos a asistir

a la función más revolucionaria.

Ente los presentes sortearánse

carrapotaes de puestos trabayu

lloñe la tierrina amada,

lloñe la familia proteutora,

onde’l capitalista-yos seya a esplotar.

.

NAGUO POR ESCRIBITE

Naguo por escribite lletres

en flores etenres d’amor,

que t’abran les persianes

al alborecer del cielu,

que te compongan sones seles

onde te bese candial los güeyos,

t’acaríñe con dulzor el sexu

hasta que les fueyes chisquen

los llíquidos del querer.

Naguo por escribite lletres

en suaños máxicos de tenrura,

en sábanes goliendo a ti,

a sudu d’amorosar na nueche,

onde la penetración nos xunte

nun abrazu d’espelma vivo,

d’un gocie que nos inunde

los sentimientos l’alma.

Naguo por ser tuyu,

tenete garráu pelos raigones

y que chirlotes la esperanza.

.

ADIOS

¿Dalgún se preguntó por qué nos llamen discapacitaos? ¿Dalgún se digno a comprobar cómo yera la mio enfermedá? Cenciellamente, llucho escontra la espasticidá que fae que se me pongan ríxides les partes del cuerpu de la zona drecha. Por mor d’ello tengo la necesidá d’una fonda tranquilidá qu’esfarrape a la mio enemiga, a la espasticidá. Tamién tengo dalgo tocada la cabeza, por eso se llama derrame celebral a lo que me dio, y nel mio caso trestocóme la sensibilidá, siendo fácil esfarrapame los sentimientos y facer que me sienta mal.

Nun ye fácil dexar lo que voi dexar, pero nun tengo más remedio que facelo. Razones de salú aconséyenme qu’esta seya la última vez qu’intente llevar p’alantre los mios blogs n’asturianu y emplegar Facebook (non pasa lo mesmo con otres redes sociales onde atopo más tranquilidá). Les lluches internes, les guerrilles, los llistos de la de dios, nun piensen que la xente pueda sofrir coles sos fataes.

Doi les gracies a xente que me fizo feliz, llogrando asina la mio victoria. Hai xente que paga la pena tar con ella hasta afogándose. Gracies a los collacios qu’espublicen tovía dientro’l grupu de Blogs n’Asturianu, cuido que’l so exemplu amuesa a les clares la posibilidá de compartir espaciu con persones d’otros sentires ensin matase. A la otra xente, a la que siempre anda a buscales, pensái enantes de facer les coses, non siempre’l que ta al to llau tien el vuesu puntu de vista, nin la fuerza pa llevar bien les vueses envestíes.

Asturies necesita lluchar escontra la xente que la fraya. La pena ye que dalgunes persones, pensando ser les sos valedores, fráyenla más que los sos enemigos.

El martes que vien, a les siete la tarde, apagaré los blogs n’asturianu y Facebook.

.

MAÑANA LLUEVE

 

Nun fae falta que miremos al home del tiempu na televisión, mañana llueve. Los discapacitaos como yo vamos tener un bastiazu descomanáu que nun nos va dexar ver lo que dalgunos llamen llibertá. Aforfúguennos de talamiente que nun somos nin a respirar l’aire podre qu’enllena cada requexu de los edificios públicos. Sicasí, nun nos tenemos de dexar acoquinar y mañana tenemos d’actuar en llibertá pero cola cabeza puesta nos que nos pisen.

Mañana llueve, pero tenemos paragües. Ánque-yos fastidie a los que nos miren namái como un oxetu de caridá.

Mañana llueve. Taría bien que se llevare consigo tanta mierda.

El martes que vien espublizarase'l segundu capítulu de la blognovela NON.SA, nun vos lo perdáis.


.

L’ORPÍN DE PRIMAVERA

 

Pinga y pinga l’iviernu hasta fartar al más santu. Nun hai barrizal que quede seco perdayuri d’Asturies nesta época del añu. Llega a tal la cosa, que dalgún fae novenes a Nuberu pa que pare tal desaguisáu. Nun sé si son efeutives o non tales plegaries, pero paez que se consigue que la primavera cuerra como una lloca pa ser a llanzar a l’iviernu a casa la guaxa. Sicasí, l’agua nun dexa de visitanos anque seya d’una mena más sele. El color d’Asturies nun se va sinón que se multiplica por mil coles milenta flores que nos remembren que tamos na estación de les Lletres, de la Llingua de nós, de la nuesa casa tan desdexada polos poderes paletos que nos gobiernen, o meyor dicho, que los dexamos gobernar.

Esti orpín primaveral ye también lo que recibe la Llingua Asturiana, gotuques delantre los remexones que recueye’l castellán na nuesa tierra. Pero nun faería falta tanta agua como se piensa, les intenciones son de más valir, asina como facer les coses con chapeta y dando siempre pasos pa endelantre. Dalgo asina como ciencia ficción mentanto nos gobiernen (tanto  gobiernu como oposición) esta gandaya d’otra galaxa. Les manifestaciones tán bien, pero ta meyor que nos movilicemos el día d’eleiciones, hai que votar en conciencia y facer pensar a los vecinos pa que nun voten a lo xo.

Nun sé si dalgún día conseguiremos la OFICIALIDÁ, ye más, nun sé si dalgún día llograremos ser autónomos de verdá. Equí faennos xirigoncia hasta Ceuta y Melilla. Lo que sí se va llograr ye que’l Dia les Lletres, a les 9 la mañana, s’espublice nesti blog el primer capítulu de la blognovela NON.SA. Entamará dalgo qu’enxamás sedréis a escaecer, una historia que nos averará a Perlora y que va facenos… Meyor que la lleáis.

.

MUNDIOS

 

Hai quien diz que tenemos vida estraterrestre a mamplén fuera d’esti planeta. Qué n’otres galaxes podemos alcontrar tierres enllenes de xente intelixente. Pero son camientos que nun dexen de ser vacallories mentanto nun seyamos a demostralo y, ai collaciu, eso ye abondo abegoso.

Sicasí, nesti’l nuesu planeta, pues alcontrar tantos mundios como persones somos, hasta diría que pa dalguna xente los mundios son ainda más que los deos d’una mano. Caún ta zarráu nel so planeta y escaez que na vida esiste la pallabra compartir.

Sí, tamos en crisis. Nuna crisis que va más p’allá de problemas económicos. Nuna crisis que fala d’egoísmu, d’individualidá en cuentes de coleutividá, de lluches de poder hasta pa saber quién va partir un mísere merucu. Nuna pallabra, soledá.

Hasta que nun seyamos a dar cola salida a esa soledá nun vamos ser a fuxir d’esa crisis moral, que non relixosa, qu’aforfuga a la humanidá y que nun la dexa vivir la vida con esperanza.

Hai quien diz que tenemos vida estraterrestre a mamplén fuera d’esti planeta. Qué n’otres galaxes podemos alcontrar tierres enllenes de xente intelixente. Quiciabes l’home, cuando los descubra, seya a saber lo que ye ser intelixente.

 

Torne de nueves tres una meditación nel ermu. Paez ser que yá sé pa onde voi. Col tiempo vais decatavos d'ello. Pa que vos empixéis, nesti blog va a apaecer una blognovela... Pero nun nos apuremos. Too va dir a tatás. ¡Cómo tien de ser!

La blognovela va entitulase NON.SA y va desarrollase en Perlora.

.

.

CAMÍN

 

 

La vida enllénase de caminos que munches veces nun yes quien a saber ónde te lleven. Tasques la cabeza, mires enfurruñáu y xubes los costazos en señal d’indiferencia finxida. Sicasí, cavilgues y cavilgues intentando dar con ello ensin ésitu dalo.

Hai cinco años y picu entamé un camín abondu abegosu que nun soi a endrechar en condiciones. El camín de los blogs aidóme a escaecer la enfermedá y llograr vencer l’afasia que venía apegada a ella. Agora, después d’esi tiempu, viénenme les duldes del trayeutu a siguir. Nun sé pa ónde tirar; pa ónde dirixir la mio búsqueda de nuevos finxos, de nueves siendes... Por eso esti blog apaez y desapaez como les playes asturianes coles marees: sé que l’espaciu de Cordobello, un blog mui aquello ta percorríu (anque torne nun futuru) pero’l d’agora, NON,  nun ta trazáu. Quiciaves seya eso lo que tien de ser, nun tar trazáu, sicasí soi home que me presta saber direiciones, conocer señes d’identidá que me den una seguridá de lo que faigo. Lleí otros blogs que me dieren pistes, que m’aconseyaren formes de ser, y permitiéronme saber lo que nun quiero ser. Ye perdifícil dar col quiz, dar cola oriella perfeuta... Voi intentar garrar la marea correuta que me faiga andar pola playa de NON. A veces pillaráme l’agua p’arribones. A veces tracamundiaréme y tiraré pa una ría en cuentes d’una playa. A veces… Nun sé. Meyor falar menos y facer más.

Pa entamar, nada meyor qu’empezar con un descansu. A metanes d’abril taré de nueves equí pa llograr que’l blog nun seya un naufraxu.

.

SOLEDÁ

 

Non, nun ye que té solu, toi acompañáu conmigo mesmu. Nun me fae faltá más. Lloñe queden aquelles dómines nes que siempre me facía falta tener xente al rodio míu. Nun ye qu’aquello tuviere mal, pero tampoco ta mal esto. Cada cosa nun tiempu y cada tiempu con un finxu claru. Agora préstame la soledá, anque de xemes en cuando té con un familiar o un amigu compartiendo un migayu de vida.

Hai xente que tien mieu a l’ausencia de ruíu, anque namái seya’l d’un merucu faciendo camín. A la mio persona aídalu a cavilgar el silenciu acompañante que t’enllena de pensamientos la cabeza y de paz la esistencia.

A min préstame tar conmigo mesmu, el meyor amigu qu’ún tien.

.

IVIERNU

 

“Poques veces l’agradable Armórica conociera los emburriones tempestuosos d’un iviernu tan duru” diz l’entamu del caberu Axtérix n’asturianu. Sabemos abondo d’iviernos na Bretaña y Asturies como pa dexalos correr ensin ser a abellugase de xemes en cuando na memoria. Porque los nuesos iviernos nun son estacionales sinón de dómines y dómines de dominiu foriatu que desprecia ensin consideranza la nuesa riqueza cultural.

El problema ta qu’anguaño somos nós los que despreciamos lo nueso y abrazamos lo que vien d’afuera ensin cavilgar un migayu nel futuru, nel presente, nel pasáu, nel nuesu pueblu…

Nun miren pa nós. Nun nos nomen nos sos periódicos, radios, televisiones, conciencies, …, porque nun esistimos pa bien o pa mal, somos un requexín que nun paga la pena considerar. Non, nun cuntamos nin pa facer esllava.

Lloñe queden les dómines de reis, espades y arguyu. Represos tamos hasta los que pensamos na nuesa tierra como’l país más rebelde que dominare l’estáu católicu. Nun somos nin a xuntar un par d’esperances enantes d’engarranos en sigles de pureza que fraya’l nuesu presente-futuru.

 

 

.

NON DE NUEVES

Non, nun ye que seya negativu sinón vindicativu.

Cuatro meses, cuatro, suañando con ser a vindicar nel blog les coses que diben pasando pel mio maxín y l’ordenador faciéndose’l llocu alloñáu de min. Munchos asuntos qu’agora pasaren d’actualidá y que sedría fato espublizar. Munchos otros que tienen d’esperar a les ganes de ser escritos. Munchos escaecíos que quiciabes dalgún día tornen a la mio cabeza y que nin siquiera sedré a reconocer…

La vida son momentos que s’escapen pente los deos como agua de montaña brava que desembarca nun deséu  d’alcordanza. Ser o nun ser. To be or not to be, que diría Shakespeare llucendo pluma d’animal rimáu.

Al fin de cuentes, tornaré a escribir les pallabres que dexaron afitaes munchos asturianos a lo llargo de la historia. Esa historia d’inxusticies que dexaron a la nuesa tierra probe nel so futuru.

 

.

BUSCO L’ALMA DESESPERADAMENTE

Nun soi a alcontrar la mio alma ente tanta basura mediática. Perdayuri de la to vida entren ensin preguntate y suelten los eslóganes que la so multicutrecional quier llantar nel to chip encostráu nes neurones. Nun-yos da más l’afamáu serviciu públicu o la llibertá d’información de les privaes, la manipulación esmolezlos más. Y perhí anda perdida la mio alma…

Cosa distinto ye’l gran serviciu que fae una televisión qu’usa’l castellán como llingua serio y después emplega l’amestáu, les más de les veces, pa les coses más folixeres. Alma y cabeza vense sometíes a terapies de choque pa sacales d’esi pozu fondu que ye’l signu d’identidá. ¿Pa qué quedremos dalgo tan alloñáu nos tiempos que cuerren de la globalización de la crisis? Vaya fatos que somos…

Toi perdíu. Nun sé lo que digo. Tengo de buscar la mio alma y traela pa casa. N’atopándola tengo de xuntala a la cabeza pa entamar un tratamientu de relaxación que les alloñe d’esta vida tan foriata.

Les obres del mio portal llegaron al nivel que fae casi imposible que viva nél un discapacitáu. Voi marchar y como la empresa d'obres parez de la marca ACME nun sé cuando tornaré. En cuantes lo faiga fairévoslo saber con un silbidín. Gracias por tar ehí.

El blog de neños El Rapazu de Venus nun entamará hasta'l 15 de xineru, si ye que tou va bien. Pacencia.

.

LLANEROS SOLITARIOS

 

 

Cuando el mundiu yera en blanco y negro galopiaben pelos pericuetos d’Asturies unos héroes con pistoles de restallones que respondíen al nome de Llaneros Solitarios. Les cais y caleyes de la nuesa tierra enllenábense de piernes con pantalones que nun yeren a atapar les ñalgues y qu’acabalgaben de suaños piquiñinos. Los sos caballos nun se llamaben Silver porque d’aquella la probitú dexaba la plata pa los servidores del réximen. Sicasí, yeren ricos n’infancies arrodiaes d’atrevencies que percorríen la llibertá de ser neños que nun viven la dictadura del peligru a lo desconocíu. Ye simpáticu vivir llibres nuna dictadura militar pero los sables nun yeren a dominar la infancia. Sacáben-yos les sos pistoles de restallones y col ruíu apavoriávenlos. Ellos sí que teníen mieu a lo desconocíu.

Agora, nes dómines del color, torna’l Llaneru Solitariu pero yá nun ye’l so tiempu. Si m’entrugues por dalgún títulu afayaízu diríate'l de “Arde Mississippi”, anque nun seya mui actual cinematográficamente falando.

.

EN CASA

Les zapatielles escalécente los pies mentánto-y eches un güeyu a la casa nun vaiga ser que té gocha pa les visites. Los llibros n’asturianu podíen tar enriba les estanteríes pero dalguién, hai tiempu, xulgó que nun taben al altor de mueble nengún. Los preseos y oxetos de tradición tán arrequexaos nun cuartu que s’usa de sobráu talamente como s’afitó nuna charra informal. Polos muebles d’enantes pasó un traperu y coló gayoleru con ellos. La factura de los nuevos muebles de diseñu dexó contentu al decorador de renome qu’enchufó un enteráu. La cultura asturiana tuvo de dir exiliada pa dalgún inventu de país con necesidá d’identidá…

Meyor garres, pones los chanclos y coles qu’esta yá nun ye la to casa. Nun sabes cuándo, nin ónde, nin por cuánto... pero hai tiempu qu’arramplaron con ella. El casu ye que dalgún de la to familia paez contentu y tou. Pero a ti nun te lo da’l papu.

 

8 de setiembre, el día de la so casa.

 

 

.

GOLOR A TIEMPU

 

 

Presta abondo salir peles puertes de casa y decatase que’l día güel distinto, güel a vida, güel a los güeyos que lu miren y deciden per onde tirar los deseos y los sentimientos. El reló pon el ritmu malpenes ún espierta, pero’l golor garra toles variantes del ritmu y méceles hasta facer una melodía que s’esparde pel tiempu.

Tán finando los arumes a costa de les mañanes del branu. Esos paseos que refresquen la cabeza y garren aliendu pa que’l cuerpu se meza col sable mentanto les foles añeren nel silenciu que ruxe. Pero apaez esa suavidá de colores que la seronda recueye de la que les piernes dan paseos pela señardá del golor a tranquilidá. Esi asosiegu qu’arreciende a remembrances de caminos fechos de mazanes cayíes del árbol, de castañes qu’armonicen col sabor a sábanes pegaes al cuerpo los domingos pela mañana, que güel a estación que torna a casa depués d’una vueltina pel xaréu de la distancia.

Préstenme los golores del tiempu. Caún na so estación; caún nel so espaciu que s’espande a lo llargo l’amestanza; caún cola so forma d’entender la vida. Caún nel arume de la so casa.

.

VIEYES ZUNES

 

Vieyes zunes qu’arramplen con flores, yerbes y yerbatos; qu’enllenen de mala yerba cada requexu de la vida; que naide nun quier pero que toos, nel fondo, sofitamos. Vieyes zunes qu’henchen cada güesu del mio cuerpo ya intento esbaratales ensin ésitu. Nun soi a ello. O meyor confieso a les clares que nun quiero. Paécense tanto a les costumes que nos dan pena, sicasí, si nun somos mui cegatos, tamién acaben con elles. Cada pueblu tien les de so. El miu tien les peores, porque son les que tengo más cerca.

Hasta'l vienres que vien nun esgoncien dafechu'l mio portal y colo darréu d'él. Asina que voi facer dalguna entrada nel nuevu blog enantes de marchar. Tengo monu.


.

NON

Vivo nun pueblín que prautica cansino la doble negación. Nun tien consideranza a la hora de xulgar negativamente a los pueblos de la rodiada, nun duldando en dicir les sos coses negatives como les úniques esistentes. Y nun dulda en valorar poco tolo que fizo como pueblu nuna esquizofrenia alloriante lloñe de la realidá. Non, nun toi esbarriando, yo formo parte d’esa corte de testerones qu’esfarrapen dafechu tolo qu’atopen per delantre. Hasta los que sofitamos lo de nós nun  duldamos en facer caza de bruxes ente aquellos que se salen del corru.

Dalgunos dan en dicir que somos los descendientes de Pedro, el que negó tres veces a Xesús, el so señor. Sicasí, deprendimos bien la so lleición porque somos quien a arrenegar de tolo que xeneró’l nuesu pueblu tantes veces como faiga falta.

Por mor d’ello toi cansu de salir del corru pa garrar la flor y ponela nel balcón. De que falen de min a les mios espaldes ensin saber mui bien porqué, yá que toi separtáu del grupu y nun m’esplayo nin una pizquina d’ellos. ¿Tanto molesta que vaiga pel camín que me pete? ¿Ónde ta la pallabra llibertá? ¿Ye que nel mio pueblu la pallabra democracia sirve de mantel pa la llacuada de los de siempre?

Non, nun quiero que me faigan dañu, por eso voi separtame más del grupu. Nun pienso dexar de conxugar el verbu vivir de la forma que me pete. Nun voi dar nin un pasu atrás. Nun tornaré otra vuelta a recibir una mocada. Nun toi dimpuesto a que les mafies culturales y polítiques del casinu s’erixan nos mios xefes. Nun quiero que’l mio pueblín muerra por mor de que dalgunos se piensen los sos valedores.

Sicasí, atópome bien na so compaña. Los paseos pela oriella del ríu que comparte colos pueblos de la rodiada, les parolaes echaes colos collacios, la tranquilidá nocherniega…, son tantes coses que m’enllenen.  Anque quiciabes te falando muncho, hai unos pocos díes camudaron los mios vecinos del pisu d’arriba y finó la mio calma. Non, nun son mala xente, pero tienen con ellos a un trasgu que nun fae más que xugar a la cuatriada tola nueche.

 

 

Esti blog, NON, naz pa que crezca pal llau que-y pete. Pa que cada entrada seya lo que me paeza nel momentu. Naz pa que’l so autor entame’l so andar con unes bones vacaciones. Asina que, pa finales d’ochobre o entamos de payares, tornaré a escribir la segunda entrada. Por ello, alón.


.