SEÑARDÁ

En pueblu yera más raro ver al carteru qu’a un gallu montés. La cabera visita del entraxeáu fo p’apurrime’l papelu del colexu eleutoral. Esta vez traíame un sobre en condiciones, d’esos qu’ún tien de firmar y tou. Ufierté-y un café como siempre y diome la escusa davezu, tovía-y quedaba munchu corréu que repartir. A quién diba engañar, quedábemos cuatro gatos na sierra y de xuru qu’al restu nun-yos tocaba cuntar cola so visita. Menudu estiráu, nun-y valía’l café de manga, tenía ser de cafetera. Pa vengame d’él, nun-y abrí la carta en dellos díes; qué dellos díes, escaecióseme dafechu nel caxón onde metía toles babayaes. Qué queréis que vos diga, siendo l’únicu vecín del pueblu y viviendo na casa más alta de tola rodiada, pa qué me facía falta una carta.

Ver de cuando en vez la furgoneta del carteru yera un luxu de la de coyer. Que te viniere otru coche, eso tinía de ser un aventáu que s’enquivocó hai muncho de carretera. Bones tardes, me dixo’l rapaz. Polo menos enseñáron-y les regles de cortesía. Ye usté’l señor Servando Payares. Coime, a qué mandaben a un espía a aquelles tierres xabaces. Mire, mandámos-y hai pocu un sobre y tovía nun nos dio contestáu. Anda, coime, ye que tovia nun lu abrí. Déxame d’una pieza, que tovía nun lu abrió depués de casi un mes. Ye qu’equí’l tiempu cuerre acordies al airón que sople. Pues mire, yera una encuesta que tamos a facer a la xente que vive en zones despoblaes. Pues si tán despoblaes, yo nun cumplo los requisitos, el pueblu cuenta con diez pites, unos cuantos coneyos, la mio vaquina llechera, una riestra gatos, los dos perros y yo, si-y paecemos pocos. Ta bien, de poca población. Pero qué coño quier usté. Si nun-y importa, fáigo-y yo la encuesta. Cómo-y apeteza.

¡Ai coime col enteráu aquel, yera peor que’l carteru! Qué como llevaba la soledá; qué si nun me prestaría vivir nuna ciudá onde tendría más servicios qu’equí; qué la señardá nun ye bueno pa naíde… Tochura tras tochura, hasta la tochura final. Qué opina usté de la subida del IVA nos productos de primera necesidá. Qué ye eso del IVA, rapacín, ye que nel chigre tienda d’abaxo nun me lo desplicaron. Val, póngo-y nun sabe nun contesta. Pues yá ta. El casu yera que se ficiere de nueche y al rapazu dába-y nun se qué andar col coche per aquelles caleyes de dios ensin un rispiu de lluz. ¡Ai santín! Ésti yera’l caberu bichu nel engranaxe de la sociedá que llamen moderno. Convidélu a cenar y a dormir na cama los mios padres.

N’acabantes cenar, entamamos a da-y al oruxu de toxu que facía. Cada vasu, el rapazu cortábase menos la llingua pa dicir fataes. Tien usté de pasar una aburrición enorme equí solu. Que va, rapaz, toi na mio tierra y colos míos. Nun me diga que nun siente señardá pola so ausencia. ¿Ausencia? Tú nun tas no que se celebra. Mira rapaz, voi tener de convidate a ún de los bailles del pueblu. Miró como’l que mira a un tarambaina yá enfiláu. Déxese de babayaes y vaiga dormila. Paezme que tienes pocu mundiu. Ven p’aca. Garrélu y llevélu pa la tenada. Entamé a falar col porteru del baille pa que dexare entrar al rapaz. Cuído qu’al probitín escomencipiába-y a tremar el cuerpu de mieu pola so persona. Nun m’estraña que pensare que taba llocu. El porteru tornó de pregunta-y a l’andecha d’espíritus si’l rapaz entraba o non. La rempuesta fo afirmativa. Lluces, pantasmes a fartar, una orquestina que partía la pana, comida y bebida dexábase ver a fargataes en meses llargues y Llarina dándome un chuchu de los qu’allucinen a les xatines. El mui santu arremelló los güeyos y, de sópitu, entamó a clisalos. Suncia garrólu pa baillar y nun lu soltó namái que pa comer o beber. Nun sé de lo que falaron, pero nun pararon de riir, xuntar les llingües y baillar. Nun lo pasó tan bien en tola so curtia vida.

El rapaz alboreció na cama de mios padres con cara de melandru rellamíu pola so melandruca. Tovía se vía’l llau en que tuviere chucada Suncia. Nun dormí tan bien na mio vida, me dixo. Entainó a xubise nel coche y tornar pa la ciudá. Yo dexe que marchare a sabiendes que nel so interior dalgo nuevo refervía.

Pasó casi un añu, y dalguna visita del entraxeáu, enantes de tornar ver al so coche volar como un aigla pelos caberos vericuetos que llevaben a casa. El rapazu llanzóse a abrazame de la que repetía qu’agora sabía lo que yera señardá. Finó’l contratu les encuestes y tuvo d’emigrar pa los países nórdicos. Ellí la percibió no que pensaba la primera vez. Tornó a la ciudá de nacencia pero nun dexó de sentila. Dálgo-y diere naquellos oruxos que nun tornó a ser el mesmu. Vi que’l coche venía cargáu col so equipaxe, que camentaba quedase. Agora hai en pueblu diez pites, dalgunos coneyos, la nuesa vaca llechera, una riestra gatos, los dos perros y dos homes, dos homes estelaos polos bailles pantasmales de la nueche.

El 6 de febreru taremos otra vuelta con toos vós cola flash fiction de Los Payares entitulada Retranca versus Señardá. Hasta entós, ta llueu.

.

LA VIDA

Escaez al candáu de la vida

y permite esconsonar corazones

en máxiques llunes

que marmullen,

que dexen cayer

         piyames

al llagu de la conciencia,

de la sable

qu’esvaría

a la fola,

demientres los pexes

garren les cañes

pa pescar ilusiones

a los gatos que se cañiquen

en fueyes

nes que ta escrita

namái

una

pallabra,

la pallabra,

la única,

amor.

Llegaron les vacaciones asina que nos vemos el 16 de xineru del 2017 cola flash fiction de Los Payares entitulada Señardá. Hasta entós, ta llueu.

.

LA BODA

El besu garróme fuera sitiu, esteláu, mirándola prestoso ensin más. Tengo d’almitir que tar xuntos facíanos más llevadera la universidá, pero…, nun sé como dicilo, nun taba preparáu p’aquel besu. Cuido que les coses teníen de dir más despaciu, por embargu ella yera como un torbolín, como un españíu en metanes la calma. D’aquel besu pasamos a la cama; siguiendo la mesma lóxica punxímonos a vivir xuntos; y ensin saber cómo, ella quedó embarazada. Pero tú nun tomabes la pastilla dichosa. Síiii, nun soi a desplicámelo, cariñín. Na so voz too parecía de lo más natural, menos aquello. Cielín, nun te pongas asina, de xemes en cuando la pastilla falla. Cómo que de xemes en cuando falla, la pastilla ye infalible si la tomes. Porqué tú tomábesla, non. Bueno, yo quería un fíu tuyu, yes tan guapu. Esto ye l’acabóse, soi tan guapu que dexó de tomar la pastilla pola so cuenta ¿Quién me manda a min enrollame con una Payares de Figaréu, la flor y nata ente los fatos? Tenía de salir, home, los mios apellíos son siempre culpables. Non, non, non, nun quería dicir eso, quería dicir que los Payares de Figaréu nun sois d’esti mundiu de vulgar carne y güesu. Y agora quedrás que pida a los mios apellíos gloriosos que saquen el talonariu y se paguen un albuertu. Pues das en duru, nun son tradicionales nin nada ellos. Capaces son de meteme nun conventu hasta que tenga al neñu y dalu n’adopción. Val, nun pienses que soi a escaqueame, casémonos güei o mañana. De testigos pueden dir dos amigos cualquiera. Fairíaslo por min. Sí. ¡Ai, cielín! Voi mercar el vistíu más afayadizu pa la ocasión. Non, non, cualquier trapín de los tuyos servirá. Nun me vas dar nin siquiera esti antoxu. Val, vémonos nos xulgaos.

Probetayu de min, pensar que con aquello yá taba tou iguau. La neña alcontróse, por casualidá, con so madre na cai de más cocorocó y los glayíos oyéronse hasta nel desiertu’l Sahara. Cielín, que diz mio madre que tien de celebrase na capiella familiar y colos parientes más cercanos. Cómo-yos desplico yo a mios padres tola engatada siendo como son unos ateos convencíos. Failo por min cariñín. Y, tal como imaxinaba, fui echáu del reinu los cielos ateos, onde me  zarraron la puerta al gritu de tú quies matanos. Meyor asina anxelín míu, d’esa mena evitamos les guerres familiares. Pero son mios padres. Facémos-yos depués una boda polo civil. Tas segura que van almitir eso. Perdona tocinín mío, la mio familia engatusa a cualquier obreru. Oye, que mios padres sedrán obreros, pero a cultos nun los ganen los tos apellíos. Pues meyor tovía, mandámos-yos les obres completes de Corin Tellado, pondránse llocos d’allegría. Pero tú que te pienses, tengo la casa enllena llibros de los meyores escritores de tol mundiu. Y toos lleídos, non como na to casa.

Nun me decaté de la que me taben a armar, soi pazguatu a rabiar. Mansulinos, asina como quien nun quier la cosa, la llista de convidaos fo enanchándose como’l bombu la neña: que si ye que toos estos son como de la familia; que si nun los convidamos van enfurruñase y armar la de dios; que si qué más te da a ti si tos padres nun van dir. Depués vinieron los negocios familiares, yeren compromisos a los que nun se podía ún zarrar; pero, qué diba a saber yo d’eso. De la to familia hai 746 convidaos y de la mía nin el tatu. Yá tamos colos tos egoísmos d’obreru. ¿Egoísmos? Sí señor, egoísmos y envidia. Pero de que tas a falar, la neña de pistu a esgaya que nun ye a mover un deu ensin que dengún criau cuerra a facé-ylo. En serio pienses eso de min. Yes un babayu. Vamos, nun nos pongamos asina. Tamos a tiempu de casanos pel xulgáu y colos meyores collacios de padrinos. Queda una selmana. Ta bien, ties razón tocinín, prepáralo too pal día la boda, cuando toos nos ten a esperar, nosotros taremos nel xulgáu casándonos. ¡Quiérote! ¡Yo a ti tamién, tocinín!

Y llego’l día. Los testigos y esti fatu fuimos puntuales. Ella, como siempre, llegaba tarde como desixe la etiqueta. Dimos vueltes y vueltes ensin ser a parar; mordimos hasta les uñes los pies; falamos y falamos pa ser a parar los nervios; hasta que la secretaria del xulgáu avisónos que’l xuez diba colar. Baxamos les escaleres como’l que vien de la derrota de Cuba. Abaxo, esperábanos un criáu de los señores Payares de Figaréu pa entreganos una carta. Abríla ensin rechistar.

Señor Jose María Álvarez Fernández

Tengo l’honor d’informa-y que la mio fía Cuca Covadonga Pelaya Sagrario Payares de Figaréu y Diaz del Prau Expropiáu casóse güei col noviu que-y teníemos preparáu de tola vida, que la va facer feliz pagando-y tolos caprichinos qu’usté nun diba ser quien a ello. Nun m’agradeza esti favor tan grande que-y faigo y que va ser a entender col tiempu. Nun sabe de la que se llibró y el bien que-y fizo a esta familia, que llogra con esti matrimoniu meyorar la so posición económica. Queda rendíu a los sos pies esti home de cuna vieyo y economíes siempre a la cabera pregunta.

La firma yera d’eses que nun sabes bien si ye un cascoxu estruxáu o un llimiagu encebolláu. Yo nun sabía si llorar o riir. De sópitu, la madrina diome un besu d’esos que llamen de película. Dígovos la verdá, prestóme pola vida. El padrín, cola mirada nos mios güeyos azules, apurrióme otru besu de campeonatu. Depués d’ello, fuimos los tres a vivir xuntos y mercamos una cama na que fuimos mui felices, ensin importanos nin lo más mínimu ser del proletariáu.

El 19 d'avientu taremos otra vuelta con toos vós con otra poesía entitulada La Vida. Hasta entós, ta llueu.

.

SILENCIU

Semiente de silencios,

alborecedora de tristures que,

sele,

dexes la vida

sola,

escosa

d’infinites conciencies que,

lladines,

naveguen pente mares vacíes,

ríos enllenos de secaños,

llagos de duldes que,

atuñaos,

miren pa l’angustia

abellugada ente callares,

ente prieses que

lleven

y

traen

los xilgueros ensin voz,

ensin aliendu,

ensin xaciu.

El 5 d'avientu taremos de nueves con toos vós con una flash fiction de la coleición Los Payares entitulada La Boda. Hasta entós, ta llueu.

.

XUGANDO A EXECUTIVOS

Enxamás nun viere un reló de fichar que se pareciere al d’aquella empresa na qu’entamaba a trabayar. Les aguyes corríen como llocomotores al debalu, dándo-yos lo mesmo dir p’alantre que p’atrás. Picares la ficha onde la picares, siempre marcaba les hores del conveniu. La entrada ordenábala’l fíu’l xefe, Payares Yunior, direutor de personal, qu’acordies a les necesidades del día mandábanos entamar a la hora que-y petare, siempre enantes de la del conveniu, claro ta. Demientres executábemos les xeres, él yera l’únicu n’emplegar el modernu ximnasiu d’empresa, exemplu modélicu pa visitantes que naguaben por invertir n’industries punta.

La hora salir poníala’l señor Payares, padre de la criatura y direutor xeneral, que llegaba a la empresa depués d’una bona siesta que ponía orden a una abondosa comida. Ente rutíu y rutíu gusmiaba pente’l llabor de los trabayadores, nun escapando a la so xabaz revisión nin siquier l’esfuerzu les cuyarapes. Si a dalguién se-y ocurría gorgutar pa salir a facer dalguna obligación, el vieyu arremellaba los güeyos, gufaba como un verracu y llanzaba una inspeición xeneral de la que nun salíemos hasta bien entrada la medianuechi. Nun yera raro qu’ésti que vos fala llegare munches veces pa la cama tremando como un rapacín y enllenu velees que malpenes me dexaben dormir.

Pasiquín a pasu, Manufactures Payares S.A. resintióse de la crisis global que truxo la entrada d’Asturies na EU y de la que nun nos llibramos enxamás. Les ganancies baxaron a galmiaes y los gastos de tan candial familia xubíen a tou meter. Dengún conseyu d’asesor de grandor y renome yera almitíu por aquellos que se pensaben tocaos pola mano de dios. A piques del mayor hostiazu que se remembrare na economía mundial, una multinacional venida d’un de los países de los cuernos fizo una ufierta que los Payares nun fueron a rechazar. Fo tan cacarexada la firma que les televisiones llocales nun dexaron pasar la oportunidá de falar d’ella nes tertulies. Ave María, canal exemplu de fé, decatóse que la multinacional quería la entrada dafechu de muyeres trabayadores na empresa. Les voces más pures nun dexaron pasar la oportunidá de falar de la Santa Cruzada y del papel femenín de la muyer naquella llucha: curiar la casa del amáu maríu y da-y fíos a mamplén. El vieyu, que debía la so fortuna al réximen, negóse dafechu a firmar con tan sacrílega firma. Los sos herederos, viendo que se-yos diba’l chollu, nun duldaron n’arrodiellase delantre l’aguafiestes y pidi-y polo más sagráu qu’almitiere la petición si nun quería esfarrapar el negociu. Almitió too si la multinacional los cuernos ponía de direutor al so fíu mayor, pa d’esta mena suavizar el fechu les muyeres.

Payares Yunior tomó desiguida posesión del cargu inaugurando un ximnasiu xigantescu que tuviere una entrada especial pel so despachu. Los xefes de los cuernos mandáron-y una valquiria que controlaba a la perfeición el negociu. Él llamábala cariñósamente la so secretaria personal. Ella contrató a muyeres cualificaes, que Yunior llamaba les gueixes cantábriques, y que facíen tol trabayu de los machos de la neurona que gastaben el tiempu col so xefe nel ximnasiu. Diba tou a la perfeición: muyeres y enxencles desendolcábemos tol trabayu mentanto los musculinos combayaben con Yunior y visitaben a los clientes.

La valquiria recibió órdenes de los xefes con cuernos nes que pedíen una meyora de resultaos. Yunior mandó-y que se tranquilizare, que tenía la solución perfeuta. Despidió a la empresa de llimpieza y mandónos a muyeres y enxencles que fueremos una hora enantes pa facer esi llabor. La valquiria reburdió too de siguío y garró’l teléfonu móvil al que-y glayó como nunca la oyéremos enantes. Mandó que-y sacáremos billetes d’avión y salió toa escopetada pal aeropuertu.

Yunior viose llibre d’aquella roxa de caldares de buen ver y entamó un tornéu de golf qu’hai tiempu tenía na cabeza. Amás d’él, participaríen los sos músculos favoritos. Escoyó’l premiu que diba ganar y mandónos a tolos enxencles de recueye pelotes pa los más gafes y p’arrecostinar colos palos, tanto pa dalos como pa recibilos. El trabayu de la empresa recayó dafechu nes muyeres, que víen como facer más y más hores estra a menos y menos salariu, acordies al troféu, diba n’aumentu. Dalgunes muyeres, fartes da tantu despreciu entamaron una güelgona a la que fueron elles y tres de nós, los enxencles más concienciaos. Yunior nun tuvo misericordia con nós, púnxonos na cai ensin dengún tipu de negociación.

La valquiria tornó engafetada y mandó facer una xunta urxente de tolos trabayadores. Los despedíos recibimos llamaes convidándonos a asistir. La entrega de premios del tornéu de golf túvo faciéndonos esperar cerca tres hores.

-¿Quién s’atreve a parar tolos actos con motivu del pieslle del tornéu de golf?

-Señor Payares Yunior, yo mesma, a las qu’usté llama la valquiria, anque d’alemana tengo poco.

-¡Queda despedida!

-¡Home! Sedría la primer vez qu’un subordináu echa a una xefa. Tien gracia. Pero vamos al asuntu. La multinacional ta pol llabor de diversificar los sos negocios y va entamar a esparder los ximnasios per mediu mundiu. Estos primeros va llevalos usté, señor Payares Junior, y los sos musculaos.

-Sedrá un honor. Sabía que’l nuesus equipín taba preparáu pa finxos más altos.

-Nun dulde usté no de más altos. La primer remesa va llanzase en Groenlandia. Yá los tán esperando colos sos graos baxo cero.

-Esto tien de ser un enquívocu.

Quedamos toos estelaos. Teníen-yos preparaos traxes climatizaos y dellos helicópteros llistos pa salir. Esquimales forníos nun los dexaron marchar del so futuru destín. La risión fo abondo. Paró cuando la valquiria nos mandó tornar al trabayu y xente con cares fríes nos esperaben nos despachos pa organizanos caún de los minutos del nuesu tiempu. Ye lo que tien ser proletariáu.

 El 21 de payares tornaremos con una nueva poesía entitulada Silenciu. Hasta entós, ta llueu.

.

ROSA DE MIO

Silenciu de vida,

tristura qu’enancha l’alma

pa que nun espierte,

pa que nun esprecete la mar.

Remembro so guapura

trespasando la escuridá del camín,

esporpollando la rosa de mio,

la perla qu’enllena la mio esistencia,

ella,

mio madre,

la que me dio dos veces la vida,

la que me dio dos veces l’amor.

Suerte

de sentila,

d’amala,

d’abrazar caún de sos sentimientos,

caún de sos desvelos.

Silenciu de vida,

que vive pa l’alcordanza

de so xenerosa presencia,

de so candial amistá,

de so abierta maternidá.

Enxamás sedré a escaecete, Madre, yes pa min l'amor que nun voi ser a finar nel tiempu que té nesti mundiu. El 7 payares tornaré cola flash fiction Xugando a Executivos.

MALDITU GARAXE

Échote de menos cada minutu, fíu. Qué cada minutu, cada segundu, cada décima segundu, o micra, o lo que te pete que seya la midida de tiempu más piquiñuca. La vida tresformóseme dafechu y toi tol día sollerte a cualquier ruiu que salga del garaxe, del malditu garaxe onde, ensin que de mano me decatare d’ello, averástete a to padre y empezaste a copiar la so zuna. Siéntolo muncho nun tenete xixiláu con más cuidáu pero, qué quies fíu, dalguién tenía de salir a ganase la vida pa ser a mantener la casa. Cuando tabes en colexu tocábame facer les xeres la casa y, de la que volvíes, colaba a llimpiar oficines hasta les tantes. ¡Vamos, qué nun nos veíemos más que p’almorzar! Intenté pagátelo los fines de selmana, dándote’l ciñu y el procuru que te merecíes, pero paez ser que nun fo a esgaya. Dexéte nes peores manes posibles, les de to padre. El mui llacazán namái gastaba les hores naquello que’l llamaba ciencia, anque fuere más bien chapuces. Nun aidaba nin un rispiu na casa cola sida que’l bon inventor tien de tar trabayando cuando llega la inspiración. ¡Cómo si él supiere’l significáu de trabayar! Vamos dexalo pa práu o aínda me refierve más la sangre.

La primer vez que tuve un niciu claro de lo que taba a soceder fo cuando’l mui fuín se presentó delantre min col inventu la so vida. Tuve de saber que la cosa fuere tuya. Yes un Payares dafechu, de la mio familia, de la xente competente. Un poviseru que recueye’l fumu xuntu a la povisa necesita abonda cabeza pa sacalu alantre, en cuentes d’andar a estudiar cómo esnala una mosca cola fin de llanzar un prototipu d’avión de calter solar. Fo l’inventu col que lu conocí y que nunca nun fue a pasar de la observación ramplona del inseutu. Hubo munches empreses interesaes en llanzar el poviseru pero to padre tuvo d’esfarrapar les espeutatives. Dixo que lo meyor yera esperar a que s’engarraren ente les compañíes p’asina saca-yos hasta l’últimu euru y lo que sacaron fo la llei antitabacu. Él como siempre dándo-y brillu a la neurona.

Aquello envalentonóte y fo cuando me cuntaste que queríes ser inventor como to padre. Tuve de garrar aliendu y dicite que podíes selo si enantes pasabes pela universidá. Nun tardasti nin un rispiu en dicime la carrera; tovía ye’l día de güei que nun soi nin a pronunciala. Coles notes que sacasti nel bachiller y el celebru que dicíen que teníes tolos profesores desiguida t’apaeció beca. Taba tan contenta, el mio neñu sorteábenselu toles universidaes europees. Hasta que llegaron los yanquis colos dólares cayéndo-yos de los bolsos y cegáronte. Marchasti dando coles pates en culu y perdíti dafechu la pista. To padre reñóme hasta fartucar asegurando que yo namái quería de cortate les ales. ¡Ai fíu del alma! Lo que nun-y prestaba nin un migayu yera nun ser a zabarciar lo de les perres que te diben dar. Al mes coló pa contigo pol aquello que los americanos podíen engañate. Como si nun supiéremos quién te diba esplumar.

Mandábesme periódicos nos que se falaba de la importancia los tos trabayos y la carrapotada de premios que te daben. Bueno, eso me cuntabes tú, porque yo d’inglés nin papa. De xemes en cuando apaecíes nes fueyes parroquiales d’esti llau la mar, desplicaben que yeras el gallu la quintana en yanquilandia. Tolos recortes diben pa un álbum qu’abrí pal mio neñu. Toos menos ún, esi nel qu’apaecía una semeya tuya na que se vía no fondero a to padre abrazáu a una muyerona y dándo-y un chuchu. Nun fuí a entender porque me lo tapabes. La carta que te mandé rellatábalo mui bien. Ante tou, dalgunes pallabres diben corríes poles llárimes que nun fui a parar. La fregona mandándote tolo que yera a ello pa que nun te faltare de comer y tú dándo-ylo a to padre pa fundilo en muyeres. ¡Qué deceición! Nun volví escribite y mandéte l’album de recortes col reportaxe de marres ensin pegar.

Aquel branu averásteti a casa col chaploteru del to proxenitor. ¡Vaya par! De xuru que nun vos quedaba nin un euro al nun mandavos yo la soldada de probetaya. Traíeis la cabeza gacha y la llingua pastosa pa dar desplicaciones. Ficísteisvos de nueves col garaxe, onde desplegasteis tola maquinaria del últimu inventu. Dicíes que yera una máquina del tiempu que yá tabeis a probar. ¡Vaya gochada d’ardiluxu! ¡Ai, si nun fuere por min! Garré tolos productos de llimpieza que sacaba del trabayu y púnxeme a esfregar hasta la cabera tuerca. Tando nello, decatéme que dalgo que tinía grabáu botón de vuelta pa casa atopábase un migayu floxu. Peguélu con cola, nun fuereis a echame a min la culpa, y marché a les carreres.

A les dolce’l meudía escuché un estrueldu nel garaxe y enfilé a toa mecha pa ver que yera. Nin vos despedisteis. Fui namai a ver el botón de vuelta pa casa separtase’l restu la máquina y cayer al suelu. La mano chocóme escontra la frente y salióme un cagamentu. Escaeciéraseme la zuna que teníeis de cambiame les coses de sitiu. Empobiné pa onde taba’l bote la cola y atopéme con que yera ún de disolvente. Y equí vos toi a esperar hai yá venti años. Pero paez ser que nun fuisteis a iguar el problemucu. Pensé que yerais más llistos. ¡Ah, gracies por dexar los planos la máquinuca! Toime a forrar.

Torna de nueves Los Payares y tola carrapotada d'aventures, espero que vos preste. Con ellos van venir poemes, proses poétiques y una nueva flash fiction llamada Sociates que se ta cociendo agora. Taremos de nueves con vos el 17 d'ochobre con una poesía entitulada Rosa de Mio dedicada dafechu a mio madre muerta n'agostu y corazón de mio corazón.

.