MIRAES D’AIRE

Foles que serenen el camín onde los nuesos cuerpos crucien les miraes día tres día, ausentes de pallabres, ausentes de futuru, namái enllenes d’esi amor del que conoz los suspiros, del que suaña con un besu imposible, del que deseya esnudar cada migayu de cuerpu conocíu pero nun ye a ello, nun s’atreve a cariciar la piel que sonríe al pasar. Esos segundos onde les miraes d’aire nos averen mantienen la confianza en que quiciabes un día demos el pasu, cruciemos les manes, saborguiemos les llingües, axuntemos el sudu los nuesos cuerpos y seyamos a vivir mirándonos por hores, por díes, por años, por cuerpos etenros d’amor, de llocu sentir, de ti, de min.

El 3 d'abril tornaremos con una flash fiction de Los Payares entitulada El Ventilador del Infiernu. Hasta entós, ta llueu.

.

EL CAXERU

Nun me digáis cómo, pero entré tou enfotáu nun caxeru automáticu, saqué la tarxeta, marqué’l pin y solicité dineru. Al metelu na cartera, decatéme que nún de los billetes había dalgo de sangre, asina como si un mosquitín me picare y dexare la so marca nel papelín. Lo más raro yera que nun me facía falta’l pecuñu, qu’aquella mesma mañana fuere a otru caxeru a sacar. Caberamente tenía la cabeza a uves, bien fuere en casa, bien nel trabayu o bien cuando salía de picos pardos colos amigos. ¡Ai fiu! Nun dexes la chola onde la ropa llavar porque sinón diba destiñísete, dicíame mio madre cada vez que tenía ocasión. El casu yera que nun-y faltaba razón a la probe, acordies me diba faciendo mayor tenía menos chapeta qu’un neñu.

Decidí que me diba facer un home de verdá, tenía de controlar la mio vida y dexar de ser tan tarambaina. La primer decisión fo dexar la tarxeta del caxeru en casa. La segunda, nun tar toles nueches de folixa colos amigonos; y digo yo, nun taría del tou mal faceme con una moza que m’enderezare. La tercera, de xemes en cuando nun sedría malo da-y dalgo de dineru a mio madre, al fin de cuentes comía, mercaba ropa, consiguía tolos potingues pa échame en cuerpu y fumaba a cargu del patrimoniu familiar. La cuarta,…, la cuarta nun me dio tiempu a pensala, sonó’l teléfonu y garrelu darréu. Tratábase de Xandru Payares, collaciu dende’l colexu, que daba una fiesta pa celebrar que la so familia marchare de vacaciones y la casa teníala llibre. Escaecíme desiguida de los mios proyeutos, punxe ropa llimpio, gaste cerca una hora colos distintos potingues y salí a tou meter ensin avisar a mio madre que nun diba cenar, como de costume. Garré l’autobús, punxe’l iPod y escuché música hasta baxame na plaza los Fatos, talamente como llamábemos al llugar por ser de munchu ringorrangu. Oyíase’l xaréu dende la puerta’l portal, vese que Xandru Payares punxere a pinchar al Dj na terraza. Ensin decatame, entré nel caxeru automáticu del bancu qu’había nel edificiu y siguí los pasos davezu pa llograr dineru. Vese que los mosquitos taben a tou trapu, un malditu chupa sangres de barriu residencial picóme nel mesmu deu que l’anterior. Púnxeme tan engafetáu que saqué la tarxeta ensin facer denguna xestión. Al métela na cartera, alcontréme con qu’ésta taba atarraquitada de cuartos. Miré y miré esperando dalgún trucu de maxa, dalguna maravía qu’esplicare aquello. Alcordábame que tuviere polo menos más d’un mes entrando nos caxeros automáticos en nun sé qué suerte d’hipnosis. Dexé la sucursal, piqué la contraseña al timbre la casa, abriéronme la puerta y llancéme tou alloriáu al ascensor. Nun yera nueche pa pensar sinón pa baillar.

Pasé’l domingu chucáu na cama, notábame ensin fuerces, como si tuviere poseyíu por un mal de difícil desplicación. A les diez la nueche llevantéme muertu fame, garré la nevera y di-y un sobresaltu. Noté que baxaba les escaleres hasta’l portal. Nun quedare con naide, nin planificare nada, les piernes asemeyaben llevame flotando ensin que la mio chola les dirixere. Púnxeme a xiblar una canción que nunca escuchare pero, por embargu, sonábame. Oyérela na televisión, taba xuru d’ello. La lluz d’aquel llocal afalóme a acércame a él; nun sirvíen copes, nin comides, yera más, paecía vacíu. Había tres máquines y nun supe cuál usar. Averéme a la pegada al cristal, les otres taben oscures y nun me prestaron tanto. Xixilé que nun hubiere mosquitos, taba fartu de tantu picotazu. Una idega viénome a la cabeza, tábemos en iviernu y naquella estación nun había anxelinos que chuparen sangre. Metí de nueves la tarxeta, nun había mosquitu nin esperteyu que valieren. Al tecletear el pin volví sentir un picotazu. Yera nel deu col qu’emburriaba’l nueve. Garré la tarxeta y salí dando los calcaños. Entós decatéme. Les dos máquines oscures teníen clavaes unes estaques. Tremé como un rapacín y empobinéme pa casa.

Mio madre miróme los güeyos. Ablucó. Nun nos puede tar a pasar esto, fíu, soltó too siguíu. Quitóme les llaves y la tarxeta, pesllóme nel cuartu y aseguróse que naide nun m’ayudare a salir. Una borrina con golor de mugorientu adueñóse de la mio mirada. Ensin desplicación dala, esapaeció la borrina dexando a un caxeru delantre de min. La tarxeta taba introducida. Púnxeme a anotar el pin. Al llegar al nueve, una estaca esgonció’l caxeru. Yera madre que me garró enantes que cayere en suelu. Nun supe yá más nada.

 

Agora toi nuna clínica de desintosicación de les tarxetas de caxeros. Entré nel programa de Bancólicos Anónimos y los vampiros del dineru nun tuvieron más aquello que soltar les garres de la mio alma. Ten curiáu, al entamu nun te decates de nada, pero desiguida, zas, pues ser el siguiente.

El 20 de marzu taremos con toos vós con una prosa poética entitulada Miraes d'Aire. Hasta entós, ta llueu.



.

HOME ENSIN CONCIENCIA DALA

A ti,

         home de paya,

de boca atarraquitada

de patries de fumu

y muerte, vacía los bolsos

de la tierra qu’un día

enterró a los seres de llei

que nun dexaron que

ñarigares

dientro les sos vides

de llibertá

de paz

d’incomprensión

pa colos tos xefes

d’oru y puxarra

que descargaron les sos conciencies

de fueu,

         de sangre,

                  d’esistencies

arrampuñaes con avaricia

nos grifos de solidaridá

y amor

que filvanen les páxines

de versos sentíos.

Esos versos quiciabes dalgún día

señalaránte

                  como

                           a

                           s

                           e

                           s

                           í

                           n

El 6 de marzu espublizaráse la flash fiction de Los Payares entitulada El Caxeru. Hasta entós, ta llueu.

.

RETRANCA VERSUS SEÑARDÁ

Servando Payares y este que vos fala alcontrábamonos descansando del trabayu la mañana cuando vimos averase al gallu montes del carteru, tan entraxeáu como davezu, col enfotu de riíse del nuesu café de manga. Colamos peles caleyes pol aquello d’obligalu a metese per dalguna llamuerga qu’otra, amosándo-y a les clares que quiciabes el calzáu que traía nun yera lo más afayadizu pal llugar onde trabayaba. Tais mui graciosinos los dos, dicía enraxonáu de la que nos atopaba, dende que llegasti a vivir a esti pericuetu, rapaz, tais mui folgaos los dos. Tres años, llevaba tres años na mio nueva vida y nun la cambiaba por nada. Menos aínda si venía esti farfantón de mierda, siempre-y armábemos dalguna a cual más curiosa. Traigo la primer carta al to nome, rapacín, y el casu ye que ta certificada. Nun sé a qué alloriáu se-y pasaría pela chola certificar una carta pa esti ñeru de soledá, falaba’l que vivía arrodiáu de xente y nun yera a cruciar media pallabra con naide porque’l so cosmopolitismu nun-ylo permitía. A estes altures tenía los zapatos y parte’l traxe como pa dir a una ópera de cuchu nel teatru de más Ringurrangu de la capital. Écho-y un garabatu y despidímonos d’él con un simplayu soníu gorrín que-y remembraba que tenía de volver pela mesma llamuerga pela que vino.

Al marchar el botes llimpies, llancéme como un llocu a esgazar el certificáu. Tiré y tiré del sobre ensin llograr que s’abriere un rispiu. Mirélu y remirélu, enfurrúñeme y enraxonéme, tou ensin resultáu dalo. Guardélu na fardela a ver si’l tiempu llograba abrilu pero nun fue hasta qu’aportó la nueche y con ella el baille de les pantasmes. Suncia garróme como a un merucu y abrió toa allampiada la fardela en busca del certificáu. Qué faes, si ye miu, díxe-y mampirolu. Qué va ser tuyu, ye pa toos, arrespostióme mui rabanera. Allorié al decatame que tola caterma pantasmes arrodiábanos. Nun sé cómo lo fizo pero abriólu, púnxolu pa enriba y soltó una risuca que nun me presto nada. Los glayíos de les otres pantasmes sacó-y el llau estrella que nun-y conocía. Estimada Andecha d’Espíritus, entamó a lleer de la que cayí na siella más cercana con cara babayu. Iguái tou pa una folixa a lo grande. Llevamos convidáu de muncho aquello. Y firmaba la Güestia.

Pidimos pintura a mamplén nel chigre tienda, onde nun movieron nin un pelu de sorpresa. Punxímonos a pintar toles cases del pueblu como si tuvieren habitaes. Les pantasmes sacaron adornos de les más fondes invisibilidaes y punxerón el baille guapu a estazón. L’actividá enanchóse a toles hores del día, cuando había lluz el trabayu yera de los humanos y na escuridá de la nueche yera tiempu de la maxa los espíritus, too ello hasta que llegó la Güestía col so convidáu d’oru. Traíen cara d’arguyu mentanto’l convidáu regalábanos con un xestu de tristura que nin el gallu montes podía superar. La bandina gaites Pantasmal fizo sonar l’himnu portugués, estáu que fuere anfitrión nel Alcuentru Mundial de Güesties y del que yera’l convidáu. Punxímonos a echar sidra como llocos y fuimos toos a da-y un culín al home atristayáu, zarapicamos los unos colos otros y cayimos toos en suelu. Les risotaes nun se dexaron esperar y la retafila de pallabres con segundes, terceres y hasta cuartes intenciones entamaron a allegrar la folixa. La bandina Pantasmal dexóse escapar pelos cancios de ciegos, a sabiendes que toos díbemos cantalos. L’home murniu trató d’aguantar la risa ensin ser dafechu a ello. Ún de la Güestia díxonos que quiciabes aquella fuere la primer vez que viere l’allegría surdir pelos llabios d’aquel personaxe de gran fama na tierra portuguesa. Averéme a él con ganes de parola. De mano les monosílabes salíen d’a poco y a poco de los sos llabios. De sopetón, soltó dos pallabres siguíes: Fernando Pessoa, el so nome y apellíu. Díxome que yera un probe escritor que, una vez cálabre, entamó una xera perdifícil, facer la “Gran Enciclopedia de la Señardá”. Dalguién-y dixere que n’Asturies había escritores señardosos y vieno a recopilalos pa la so obra. Quise falar más ratu con él, pero Llarina garrólu pelos brazos y entamaron a baillar como si la vida nun fuere namái que valsiar. Suncia, cobiciosa, arrampuñó-ylu d’un tirón y dambos danzaron a lo lloco. Vasos de sidra, pallabres con sorna, cosadielles al debalu, comida a fartar, cantaraes desafinaes,… y toa una riestra de tradición folixera bombardiaron al probe lusu que nun via fin a tanta comedia.

-Perdonai, perdonai, ónde ta l’escusáu.

Foron les pallabres que pararon aquel xaréu. Voi yo con usté. Déxame a min. D’eso nada, yo sedré’l so anfitrión… Callái, a esti señor llévolu yo, acabó sentenciando Suncia. De la que volvieron, el lusitanu taba convencíu de da-y un xiru al so trabayu, yá nun diba ser “Gran Enciclopedia de la Señardá”, tornaríase en “¿Señarqué…? Ho”, una auténtica biblia de la retranca.

El 20 de febreru espublizaráse'l poema Homes ensin Conciencia dala. Hasta entós, ta llueu.

.

SEÑARDÁ

En pueblu yera más raro ver al carteru qu’a un gallu montés. La cabera visita del entraxeáu fo p’apurrime’l papelu del colexu eleutoral. Esta vez traíame un sobre en condiciones, d’esos qu’ún tien de firmar y tou. Ufierté-y un café como siempre y diome la escusa davezu, tovía-y quedaba munchu corréu que repartir. A quién diba engañar, quedábemos cuatro gatos na sierra y de xuru qu’al restu nun-yos tocaba cuntar cola so visita. Menudu estiráu, nun-y valía’l café de manga, tenía ser de cafetera. Pa vengame d’él, nun-y abrí la carta en dellos díes; qué dellos díes, escaecióseme dafechu nel caxón onde metía toles babayaes. Qué queréis que vos diga, siendo l’únicu vecín del pueblu y viviendo na casa más alta de tola rodiada, pa qué me facía falta una carta.

Ver de cuando en vez la furgoneta del carteru yera un luxu de la de coyer. Que te viniere otru coche, eso tinía de ser un aventáu que s’enquivocó hai muncho de carretera. Bones tardes, me dixo’l rapaz. Polo menos enseñáron-y les regles de cortesía. Ye usté’l señor Servando Payares. Coime, a qué mandaben a un espía a aquelles tierres xabaces. Mire, mandámos-y hai pocu un sobre y tovía nun nos dio contestáu. Anda, coime, ye que tovia nun lu abrí. Déxame d’una pieza, que tovía nun lu abrió depués de casi un mes. Ye qu’equí’l tiempu cuerre acordies al airón que sople. Pues mire, yera una encuesta que tamos a facer a la xente que vive en zones despoblaes. Pues si tán despoblaes, yo nun cumplo los requisitos, el pueblu cuenta con diez pites, unos cuantos coneyos, la mio vaquina llechera, una riestra gatos, los dos perros y yo, si-y paecemos pocos. Ta bien, de poca población. Pero qué coño quier usté. Si nun-y importa, fáigo-y yo la encuesta. Cómo-y apeteza.

¡Ai coime col enteráu aquel, yera peor que’l carteru! Qué como llevaba la soledá; qué si nun me prestaría vivir nuna ciudá onde tendría más servicios qu’equí; qué la señardá nun ye bueno pa naíde… Tochura tras tochura, hasta la tochura final. Qué opina usté de la subida del IVA nos productos de primera necesidá. Qué ye eso del IVA, rapacín, ye que nel chigre tienda d’abaxo nun me lo desplicaron. Val, póngo-y nun sabe nun contesta. Pues yá ta. El casu yera que se ficiere de nueche y al rapazu dába-y nun se qué andar col coche per aquelles caleyes de dios ensin un rispiu de lluz. ¡Ai santín! Ésti yera’l caberu bichu nel engranaxe de la sociedá que llamen moderno. Convidélu a cenar y a dormir na cama los mios padres.

N’acabantes cenar, entamamos a da-y al oruxu de toxu que facía. Cada vasu, el rapazu cortábase menos la llingua pa dicir fataes. Tien usté de pasar una aburrición enorme equí solu. Que va, rapaz, toi na mio tierra y colos míos. Nun me diga que nun siente señardá pola so ausencia. ¿Ausencia? Tú nun tas no que se celebra. Mira rapaz, voi tener de convidate a ún de los bailles del pueblu. Miró como’l que mira a un tarambaina yá enfiláu. Déxese de babayaes y vaiga dormila. Paezme que tienes pocu mundiu. Ven p’aca. Garrélu y llevélu pa la tenada. Entamé a falar col porteru del baille pa que dexare entrar al rapaz. Cuído qu’al probitín escomencipiába-y a tremar el cuerpu de mieu pola so persona. Nun m’estraña que pensare que taba llocu. El porteru tornó de pregunta-y a l’andecha d’espíritus si’l rapaz entraba o non. La rempuesta fo afirmativa. Lluces, pantasmes a fartar, una orquestina que partía la pana, comida y bebida dexábase ver a fargataes en meses llargues y Llarina dándome un chuchu de los qu’allucinen a les xatines. El mui santu arremelló los güeyos y, de sópitu, entamó a clisalos. Suncia garrólu pa baillar y nun lu soltó namái que pa comer o beber. Nun sé de lo que falaron, pero nun pararon de riir, xuntar les llingües y baillar. Nun lo pasó tan bien en tola so curtia vida.

El rapaz alboreció na cama de mios padres con cara de melandru rellamíu pola so melandruca. Tovía se vía’l llau en que tuviere chucada Suncia. Nun dormí tan bien na mio vida, me dixo. Entainó a xubise nel coche y tornar pa la ciudá. Yo dexe que marchare a sabiendes que nel so interior dalgo nuevo refervía.

Pasó casi un añu, y dalguna visita del entraxeáu, enantes de tornar ver al so coche volar como un aigla pelos caberos vericuetos que llevaben a casa. El rapazu llanzóse a abrazame de la que repetía qu’agora sabía lo que yera señardá. Finó’l contratu les encuestes y tuvo d’emigrar pa los países nórdicos. Ellí la percibió no que pensaba la primera vez. Tornó a la ciudá de nacencia pero nun dexó de sentila. Dálgo-y diere naquellos oruxos que nun tornó a ser el mesmu. Vi que’l coche venía cargáu col so equipaxe, que camentaba quedase. Agora hai en pueblu diez pites, dalgunos coneyos, la nuesa vaca llechera, una riestra gatos, los dos perros y dos homes, dos homes estelaos polos bailles pantasmales de la nueche.

El 6 de febreru taremos otra vuelta con toos vós cola flash fiction de Los Payares entitulada Retranca versus Señardá. Hasta entós, ta llueu.

.

LA VIDA

Escaez al candáu de la vida

y permite esconsonar corazones

en máxiques llunes

que marmullen,

que dexen cayer

         piyames

al llagu de la conciencia,

de la sable

qu’esvaría

a la fola,

demientres los pexes

garren les cañes

pa pescar ilusiones

a los gatos que se cañiquen

en fueyes

nes que ta escrita

namái

una

pallabra,

la pallabra,

la única,

amor.

Llegaron les vacaciones asina que nos vemos el 16 de xineru del 2017 cola flash fiction de Los Payares entitulada Señardá. Hasta entós, ta llueu.

.

LA BODA

El besu garróme fuera sitiu, esteláu, mirándola prestoso ensin más. Tengo d’almitir que tar xuntos facíanos más llevadera la universidá, pero…, nun sé como dicilo, nun taba preparáu p’aquel besu. Cuido que les coses teníen de dir más despaciu, por embargu ella yera como un torbolín, como un españíu en metanes la calma. D’aquel besu pasamos a la cama; siguiendo la mesma lóxica punxímonos a vivir xuntos; y ensin saber cómo, ella quedó embarazada. Pero tú nun tomabes la pastilla dichosa. Síiii, nun soi a desplicámelo, cariñín. Na so voz too parecía de lo más natural, menos aquello. Cielín, nun te pongas asina, de xemes en cuando la pastilla falla. Cómo que de xemes en cuando falla, la pastilla ye infalible si la tomes. Porqué tú tomábesla, non. Bueno, yo quería un fíu tuyu, yes tan guapu. Esto ye l’acabóse, soi tan guapu que dexó de tomar la pastilla pola so cuenta ¿Quién me manda a min enrollame con una Payares de Figaréu, la flor y nata ente los fatos? Tenía de salir, home, los mios apellíos son siempre culpables. Non, non, non, nun quería dicir eso, quería dicir que los Payares de Figaréu nun sois d’esti mundiu de vulgar carne y güesu. Y agora quedrás que pida a los mios apellíos gloriosos que saquen el talonariu y se paguen un albuertu. Pues das en duru, nun son tradicionales nin nada ellos. Capaces son de meteme nun conventu hasta que tenga al neñu y dalu n’adopción. Val, nun pienses que soi a escaqueame, casémonos güei o mañana. De testigos pueden dir dos amigos cualquiera. Fairíaslo por min. Sí. ¡Ai, cielín! Voi mercar el vistíu más afayadizu pa la ocasión. Non, non, cualquier trapín de los tuyos servirá. Nun me vas dar nin siquiera esti antoxu. Val, vémonos nos xulgaos.

Probetayu de min, pensar que con aquello yá taba tou iguau. La neña alcontróse, por casualidá, con so madre na cai de más cocorocó y los glayíos oyéronse hasta nel desiertu’l Sahara. Cielín, que diz mio madre que tien de celebrase na capiella familiar y colos parientes más cercanos. Cómo-yos desplico yo a mios padres tola engatada siendo como son unos ateos convencíos. Failo por min cariñín. Y, tal como imaxinaba, fui echáu del reinu los cielos ateos, onde me  zarraron la puerta al gritu de tú quies matanos. Meyor asina anxelín míu, d’esa mena evitamos les guerres familiares. Pero son mios padres. Facémos-yos depués una boda polo civil. Tas segura que van almitir eso. Perdona tocinín mío, la mio familia engatusa a cualquier obreru. Oye, que mios padres sedrán obreros, pero a cultos nun los ganen los tos apellíos. Pues meyor tovía, mandámos-yos les obres completes de Corin Tellado, pondránse llocos d’allegría. Pero tú que te pienses, tengo la casa enllena llibros de los meyores escritores de tol mundiu. Y toos lleídos, non como na to casa.

Nun me decaté de la que me taben a armar, soi pazguatu a rabiar. Mansulinos, asina como quien nun quier la cosa, la llista de convidaos fo enanchándose como’l bombu la neña: que si ye que toos estos son como de la familia; que si nun los convidamos van enfurruñase y armar la de dios; que si qué más te da a ti si tos padres nun van dir. Depués vinieron los negocios familiares, yeren compromisos a los que nun se podía ún zarrar; pero, qué diba a saber yo d’eso. De la to familia hai 746 convidaos y de la mía nin el tatu. Yá tamos colos tos egoísmos d’obreru. ¿Egoísmos? Sí señor, egoísmos y envidia. Pero de que tas a falar, la neña de pistu a esgaya que nun ye a mover un deu ensin que dengún criau cuerra a facé-ylo. En serio pienses eso de min. Yes un babayu. Vamos, nun nos pongamos asina. Tamos a tiempu de casanos pel xulgáu y colos meyores collacios de padrinos. Queda una selmana. Ta bien, ties razón tocinín, prepáralo too pal día la boda, cuando toos nos ten a esperar, nosotros taremos nel xulgáu casándonos. ¡Quiérote! ¡Yo a ti tamién, tocinín!

Y llego’l día. Los testigos y esti fatu fuimos puntuales. Ella, como siempre, llegaba tarde como desixe la etiqueta. Dimos vueltes y vueltes ensin ser a parar; mordimos hasta les uñes los pies; falamos y falamos pa ser a parar los nervios; hasta que la secretaria del xulgáu avisónos que’l xuez diba colar. Baxamos les escaleres como’l que vien de la derrota de Cuba. Abaxo, esperábanos un criáu de los señores Payares de Figaréu pa entreganos una carta. Abríla ensin rechistar.

Señor Jose María Álvarez Fernández

Tengo l’honor d’informa-y que la mio fía Cuca Covadonga Pelaya Sagrario Payares de Figaréu y Diaz del Prau Expropiáu casóse güei col noviu que-y teníemos preparáu de tola vida, que la va facer feliz pagando-y tolos caprichinos qu’usté nun diba ser quien a ello. Nun m’agradeza esti favor tan grande que-y faigo y que va ser a entender col tiempu. Nun sabe de la que se llibró y el bien que-y fizo a esta familia, que llogra con esti matrimoniu meyorar la so posición económica. Queda rendíu a los sos pies esti home de cuna vieyo y economíes siempre a la cabera pregunta.

La firma yera d’eses que nun sabes bien si ye un cascoxu estruxáu o un llimiagu encebolláu. Yo nun sabía si llorar o riir. De sópitu, la madrina diome un besu d’esos que llamen de película. Dígovos la verdá, prestóme pola vida. El padrín, cola mirada nos mios güeyos azules, apurrióme otru besu de campeonatu. Depués d’ello, fuimos los tres a vivir xuntos y mercamos una cama na que fuimos mui felices, ensin importanos nin lo más mínimu ser del proletariáu.

El 19 d'avientu taremos otra vuelta con toos vós con otra poesía entitulada La Vida. Hasta entós, ta llueu.

.