TESTAMENTU D’AUTOAYUDA

Sé que-yos va sonar a trola tolo que-yos voi cuntar pero tengo de dici-yos qu’a min, si nun fuere porque lo viví, tamién me sonaría, nun los culpo por ello. Sicasí, tengo de pidi-yos que llean tola historia hasta’l final. Sepian qu’esti’l so autor escríbelu como verdaderu testamentu de dalguién que va morrer por una enfermedá mísere y mui común nestos díes, l’egoismu. Confío qu’esta declaración, salida de lo más fonderu del mio corazón, sirva como vacuna a tan afogante mal.

Too entamó un branu cualquiera, onde la calor y la folixa tresfórmense en moneda de cambiu ente los homes. Esti que-yos fala viniere de dexar a muyer y fíos nel xalé braniegu p’asina entamar a retozar llibremente. Averéme al despachu onde atendía a los pacientes y escribía los mios afamaos llibros d’autoayuda; saludé a Xila, enfermera y secretaria al cincuenta por cien; preparé’l maletu colos papelos pal congresu al que diba asistir y pol que cobraba una cantidá bultable; empobiné pal garaxe cuando Xila m’avisó qu’una muyer un migayín d’estrafalaria pidía ser recibida con urxencia. Púnxe-y cara asesín mentanto llanzaba’l maletu escontra’l sofa onde s’acostaben los zarrapastrosos que trataba. Decatéme que l’allocada entrare ensin dengún permisu; llevaba abrigu d’iviernu en plena fola calor; fíce-y un xestu pa que se lo quitare; refugó cola cara que pon un perru cuando dalguién-y quita’l güesu; ufierté-y una siella y púnxeme a rellená-y una receta d’unos tranquilizantes placebos. Preguntóme si namái diba facer aquello por ella; cunté-y la priesa que tenía pa garrar un avión; lo que dixo depués nun fui a entendelo; volví disculpame rellatándo-y que m’esperaben nel congresu anual más importante del país; miróme como neña a la que-y quiten la muñeca; tranquilicela cuntándo-y que Xila-y daría fecha y hora pa la cita prósima. El silenciu fízose col llugar; eso llevóme a solta-y una trola al respeutu les pastilles que-y recetaba: nun santiamén treformárense nel pasu previu a ser tratada. Nun la dexe gorgutar, garré’l maletu y apuréme pal coche.

Na desviación de l’autovía pal aeropuertu, unos troníos alloriantes escomencipiaron a esfacer aquel meudía soleyeru. Pa completar l’escenariu, rayos y rellámpagos truxeron agua a xarrazos. Tuve de llevantar el pie del acelerador y ceguñar los güeyos pa ser a ver dalgo. El aparcamientu del aeródromu viose atapáu por una borrina moviéndose a galmiaes. Al dir facturar l’equipaxe, avisaron que tolos vuelos taben suspendíos temporalmente. Esperé y esperé; desesperé y desesperé; cuando peor taba la cosa, anunciaron la suspensión definitiva los vuelos.

 

 

Al llegar al mio xalé nes afueres la ciudá, la entrada pa coches taba abierta. Trespaséla ensin preocupación y zarréla col mandu a distancia. Nun diba ser la primer vez que dalguién la familia s’escaecía de piesllala. Aparqué nel garaxe y empobiné pa la casa. El seguru taba echáu y tuve de tecletear la contraseña. Posé les maletes na entrada, pa salir escopetáu al día siguiente, y fui pa la cocina a cenar dalgo. Un estrueldu dexóse sentir na puerta. Miré pela cristalera: yera la muyer del abrigu con un home de negru y sombreru d’ala ancha.

-Abra, sabemos que ta dientro. Nun nos faiga trabayar y arreventar el seguru. Somos a ello, pero de xuru qu’a usté nun-y prestaría.

L’home torcióme’l xestu y somorgióse na escuridá la nueche. Ella, como yá yera vezu, nun esperó a que la convidare y empobinóse pal sofa; quitóse l’abrigu y quedó con una especie tules estrozaos; tumbóse como’l restu los pacientes y emprimó a charrar.

-Un Payares estrozóme la vida y otru me la tien d’iguar. Nun me mire asina. Tol mundiu sabe qu’usté ye l’afamau doctor Payares que trata a los llocos…

Una retafila de llaceries salieron per aquella boca. Resúmoles pa nun los cansar. Vivía nuna biesca pertranquila hasta que llegó un guarda forestal un migayín castrón; ella ufiertó-y toles sos ayalgues pero él desprecióles; coló alloriada hasta qu’atopó’l Nuberu y la llevó a la mio consulta.

Rellámpagos y troníos; rayos y llaceries; nun sabía si llevantala del sofá y echame yo. La cabeza esvariábame per siendes peligroses. Tatexé, carraspié, hasta que los güeyos m’entamaron a xarriar, neto al tiempu que facía nel aeropuertu. A ella paeció-y qu’aquello yera un tratamientu revolucionariu; al veme como una piltrafa, sintióse muncho meyor; riose a carcaxada llimpio, diome dos chuchos nos papos y coló. De la que salía, aconseyóme tar ellí al día siguiente si nun quería conocer estaos del tiempu muncho peores que los d’aquella xornada.

 

 

Ensiguida tuve de zarrar el despachu y abrir una consulta en casa. Xanes, trasgos, cuelebres y tola riestra de seres de la mitoloxía asturiana vinieron a tratamientu. ¡Cómo taben los probes! Vaya peazu culiebres velenoses que yeremos los homes. Dexé los llibros d’autoayuda por noveles negres nes que les víctimes yeren mitolóxiques. Tuve tal ésitu, que me llamaron de tol mundiu pa dar charres sobre tan orixinal obra y enllename los bolsos de dineru. Facienda golióse dalgo de negociu illegal por mor de los mios cobros n’ayalgues prietes. Colé a vivir a un paraísu d’esos que llamen fiscales pa fuxir d’ellos. Ellí monté una clínica de tratamientu pa seres mitolóxicos de tol planeta. Tuve de facer cuatro ampliaciones pa ser a acoyer a tantu ser, nun pensé qu’hubiere tantos. El casu fo qu’al final me fice con toles riqueces que poseyíen tan babayos seres. L’oxetivu d’un home ye aidar a otros seres mentanto tengan perres pa pagar. Abandoné a la arruinada mitoloxía y di un nuevu xiru al mio negociu, con un ésitu d’espatarrar.

Lo que nun conocía yera lo poderosos que podíen llegar a ser los seres mitolóxicos. Pensaba que yeren cuentos chinos que se creíen sólo los pazguatos. Agora sé que non. Dende hai meses que me persiguen cuélebres, dragones, arpíes,… Cuando m’atopen, van acabar cola mio vida. Déxovos, que piquen a la puerta. ¡Coime! Ye esa Xana castrona, la más peligrosa de toos. Y depués paecía una mosquina muerta.

El llunes 7 de marzu tornamos de nueves a tar con toos vós col final de la triloxía poética tierra-cielu-mar. Hasta entós, ta llueu.


.

UNA VIESCA PA UN NOVATU

Pensé que diba dar blincos, glayar como un llocu y convidar a tol que se me pusiere per delantre. Taba mui enquivocáu. Quedé alloriáu, con cara fatu, mirando a tolos que comprobaben les llistes y poníen la mesma cara pininos; entós, averábame a ellos, preguntába-yos si aprobaren la oposición y, como dicíen que sí la mayoría, felicitábalos. Ellí entamaba la mio vida de funcionariu.

Nun me dio tiempu a mazcalo too y yá me llamaren pa escoyer destín. Fo entós cuando me decaté de la importancia que tenía’l llugar qu’ocupabes na oposición. Anque ficiere un esamen ensin dengún fallu, saqué la última plaza. Coses de ser fíu d’obreru. El mio primer destín de guarda forestal resultó ser nel parque natural más perdíu del mapa. Imaxináivos como pintaba, que’l xefe de personal dixo que quería falar conmigo enantes de colar pal llugar. Saludóme endemasiáu cortes pa la cara chancia que se-y albidraba. Díxome que diba tener la meyor cabaña de toa Asturies y que diba tar como un rei. La burlla notábase-y nel tonu solemne que-y quería dar a aquel discursu vacíu. Entamé a preocupame un migayín de tanta cascancia. Faló y faló de les virtúes que me diba atopar ellí. Siguió col que si patatin, que si patatán. Púnxeme a tremar como un pitín tou moyáu. Dexó pal final dalgo a tener en cuenta: tolos guardies forestales anteriores desapaecieren depués de falar d’una muyer que los acosare día y nueche. Quitó-y fierru a l’asuntu y despidióme con dos golpazos na espalda. Naquel intre, alcordéme que mio padre, mineru y campesín, m’alvirtiere de les novataes que-yos solíen gastar a los novatos. Empezábemos bien la cosa. El xefe de personal enquivocábase conmigo.

La cabaña cuntaba con toles comodidaes qu’un yera a imaxinar naquella parte’l mundiu. El llugar, anque lloñe de la civilización, podía calificáse-y d’ablucante. El trabayu xulguélu de lo meyor pa un home como yo, amante de la natura. Aquel castrón pasárase un migayín metiéndome mieu, los funcionarios de moqueta piénsense graciosinos a esgaya. Si él supiere del pie que coxeaba yo, aforraríase tola predicazaña.

Di una ronda pel llugar pa faceme a y con él. Namoréme enseguidina de la maravía que me tocare cuidar, nun sedría a suañar sitiu meyor. Colé pa la cabaña a pegame’l primer almuerzu na natura y echar una siestina na sinfonía musical de les voces de los sos habitantes. Pel camín, averéme a una fonte a beber agua y, al llevantame del grifu, vi a una muyer al par d’una cueva per onde salía un regatu. Mira si yeren pesaos cola novatada. ¡Qu’a min nun me va eso! Enllenéme de paciencia y preparéme pa la representación. Yera una muyer metida en carnes, con formes mui renacentistes, de piel blanca y espeteres más que grandes. Pasárense colos ropaxes, una coleición de tules tresparentes dexaben ver cada requexu del cuerpu. Peñaba’l so pelo roxo con un cepillu doráu que paecía d’una película de princeses. Enantes qu’abriere la boca pa falame, di media vuelta y dexela pampirola.

Tuvo de ser gorda la que-yos armó a los fatos de la capital. Pasaren dos díes enantes qu’aquella pidigüeña de los escenarios se dexare convencer pa volver a tentame. ¡Probitina, anxelín del cielu! Nun sabía con quién se les gastabe. Apaeció na mesma cueva desenredando un cadexu tan doráu como’l peñe de la otra vez. L’atrezu paecía tar sacáu d’una compañía teatru d’aficionaos. Malpenes crució los güeyos colos míos, cuspió a tou meter la retafila que tenía nel guión. Dixo que yera una Xana, que naguaba por llevame a la so cueva y ellí entregame tola ayalga d’oru que guardaba. Respondí-y que yera’l guardia la viesca, que taba ellí pa facer cumplir la llei, que si daba cola so ayalga y taba ensin declarar a facienda, diba detenela a tou meter. Entamó a tatexar, les llárimes esnidiáron-y pelos papos y coló toa enfurruñada. Daquella nun-y diben pagar y el xefe de personal cagaríase en tolos santos. Tendría de falar con él pa qu’escoyere actrices menos talludines qu’aquella.

Nun volví vela hasta pasaos otros dos díes, ye dicir, güei al meudía. Siguía testerando en llevar aquella piltrafa vistíu, que nun erotizaba a naide y amosaba la so duldosa procedencia. Esperábame con una carrapotada de quincallería sacada d’una película de pirates, pero faltaba-y tola fuercia al nun llevar una pata palu. Imaxínomela con aquellos tules, un parche de color rosa, un gorrín con una calavera de llucines y una pata palu dorada faciendo xuegu col peñe, los cadexos y tola trangayada que-y acompañaba. Vamos, un cromín sacáu d’una opereta de puticiu. Púnxoseme de rodíes, llanzó les sos manes al aire en señal de súplica y salió-y una vocina de dibuxos animaos.

-Naide fo a faceme esto enantes. Regálote les mios ayalgues con tal de que coles d’equí y nun-y digas a naide que fuiste a riíte d’una Xana. La vergoña cayera enriba min, pero si s’entera la xente, la fama les Xanes nun tornará nunca enxamás.

-Mira que yes cafiante. Yá valió de novataes. Garra tola quincallería que traes contigo y fuxe d’esta viesca. Yo nun voi cuntar nada a naide, nun t’esmolezas. Y agora, déxame en paz.

Coló toa enrabietada y dexó l’atrezu tres d’ella. Lláncelo, cansu de too aquello, al regatu y marche pa la cabaña. Y agora equí toi, esperando al mio mozu que va pasar conmigo la primer fin de selmana. Si s’entera mio padre da-y mal. El fíu d’un minerón, manfloru perdíu. La vida ye asina, nun te da a escoyer. Como nun-y dio a escoyer a la zumbada esta. Por muncho que-y prometiere nun lo cuntar, sé que Belo, el mio refresquín, va ser el primeru d’una riestra d’ellos a los que-yoslo voi rellatar. Los xenes Payares de mio madre oblíguenme a nun guardar nin un solu secretu.

Vémonos el llunes 15 febrero equí, nel blog NON, con otra flash fiction que vos va prestar a fartar. Hasta entós, ta llueu.

.