OBEDIENTE

 

Piquen a la puerta. Nun sedrá esta servidora quien abra ensin el permisu de mio madre. Non señor, téngolo clarísimu. Ye la primer vez que marcha ensin dexar por escritu les normes que rixen la casa. Y yo, qué quies que te diga, obedézola hasta nes comes. ¡Qué comes! Hasta nos puntos suspensivos… Cualquier deseyu que tien, desvívome por cumplilu.

¡Qué pesaos! Siguen picando. De xuru que ye la vecina. Ye más palices qu’una pareya de guardies civiles nel cuartón. Va dada. Nun tengo permiso pa abri-y. Sabe de sobres qu’ensin l’aprobación de mio madre nun hai que facer. Ella deseyaríalo asina. Y los sos deseyos son órdenes pa min.

¡Pica, pica, vas cansate! Y agora vienes con más xente. ¡Vaya petarda! Yo ya nun tengo de facer ensin el permisu de mio madre. Y téngolo difícil. Dende que pidió aquel deseyu desdibuxóseme tola normativa. ¡Qué más quisiera yo que saber que norma aplicar! Vaya deseyu. Pa min que la probe achochaba. Mira que dicir que porqué nun morrería d’una vez por toes.

Con esti microrrellatu finamos l'añu y deseyámosvos que 2016 seya de los más afayadizu pa toos. Tornaremos el 4 de xineru cola serie de rellatos Los Payares, que son xente que tien en común tener esi apellíu y nada más. Casi toos nun se conocen ente ellos y nun piensen qu'esti blog vaiga inmortalizalos. Hasta entós, ta llueu.


.

TIERRA

Caracolín de ruxerrux

sobre foles cubiertes de sentimientos,

lluvia desferrada nes sensaciones

recoyíes pol sele silenciu,

marmurar ente gotes floriaes

cuando cayen les xelaes d’iviernu,

airón d’esperances valdunes

na nueche d’arumoses lluces,

tierra ente foles,

tierra de silenciu,

tierra floriada d’esperanza,

tierra,

arródiame col dulzor de la llume

d’esi llar que fala llariegu

nuna nube ente cumes

d’amor.

El llunes que vien, 28 d'avientu, espublizaré un microrrellatu qu'espero seya del vuesu gustu. Tres d'ello, el llunes 4 de xineru entamaré una nueva aventura, los Payares. Nun son meses del añu, nin poblaciones prestoses, nin sitios nos que meten la paya... Ye un apellíu, y a la xente que lo lleva pásen-y histories abondoses que de xuru vais lleer. Hasta entós, ta llueu.


.

CASUALIDÁ (y 10)

El camín pa Xixón sirvióme pa desplica-y a Poldo’l baturiciu que taben a montar y a pidi-y perdón por ponelu nel disparaderu daquellos xostrones. Víase un home mui enteru, en dengún intre me montó la de coyer anque lo mereciere. Entré na so vida y esfarrapé-yla dafechu ensin dengún miramientu.  

-La mui sacabera intentó conquistame pero díxe-y que taba casáu, que yera mui feliz y que tenía un fíu de lo más guapu. Nun tenía denguna intención de dexalos. A ella nun-y importó, siguió testerona metiéndose pel mediu na mio vida.

Aquello remembróme lo fatu que fuí. Nun m’importó muyer y fíos cuando Gada m’achucó.  Aquel home nun se merecía lo que-y taba a pasar. Falé-y qu’en llegando a Xixón consiguiría-y documentos falsos na comisaría pa que reficiere lo que pudiere de la so vida. Dixo que nun podía refacer nada, que la so muyer nun lu quería ver delantre, que creía la versión de Gada dafechu, y eso yera lo único que-y importaba.

Una vez en Xixón, Roi movió tola cadena de favores pa iguar la vida de Poldo, anque a él nun-y importare muncho. Mantúvelu guardáu nel mio pisu. Na televisión aseguraben que la so búsqueda taba a dar los sos frutos. En llogrando tolos papelos, metímoslu nun avión con destín Madrid, onde pillaría un tren que lu acercare a Llisboa na nueche. Despacháremos el problema, pero yo y Roi nun lu fuimos a escaecer, cuando tábemos solos falábemos d’él, de lo que taría a facer, de si llograría conocer a una llisboeta, y asina milenta camientos que pasaben peles nueses charles, pela nuesa amistá.

                                           

Otru día como munchos que sucedieron depués,  salí cansu del trabayu, cené nel chigre de siempre y xubí a descansar un migayín a casa enantes de dir a los pubs de colorinos onde quedaba con Roi. Prendí la televisión col aquello de ver les noticies pero, de nueves,  apaeció ella na pantalla de plasma, yera la nueche San Xuan, taba nel espigón ente la playa Riazor y Orzán, en A Coruña. Entrevistábenla. Miraba a la pantalla toa gayaspera. Cerquina d’ella, un conicíu políticu que tuviere nel Vaticanu nun-y perdía’l güeyu. Un home, Poldo, apuntóla con un arma. Los glayíos nun me dexaron pensar más. El mandu a distancia apagó la escena.

 

FIN

 

EL LLUNES 21 D'AVIENTU VA ESPUBLIZASE'L PRIMER POEMA D'ESTI BLOG QUE TIEN POR TÍTULU "TIERRA". NUN VOS LO PERDÁIS, NEL SAL L'ASTURIES DEL MIO ALMA, NON L'ASTURIES DEL PANFLETU. HASTA ENTÓS, TA LLUEU.

 

 

.

 



 

 

CASUALIDÁ (9)

Depués de pidir una caña p’acompañame, Roi díxome que taben rellucentes hasta les celdes pa los enfilaos de fin de selmana. Nun esperaba menos de xente tan eficiente. Al salir del chigre, di les ordes pa xurgar na casa de Poldo, anque a eses altures taba seguru que tendríen llimpios hasta los contadores del agua. Atopamos una casa mediu vacía, non porque él nos boicoteare, sinon porque la so muyer lu abandonare hai hores, llevándose al fíu dambos con ella. Poldo nun atapaba los sos güeyos roxos de tanto llorar, por más que quisiere facelo nun sedría quien a ello. Imaxinéme que dalgo asemeyáu m’asocedía a min. Resultó fácil la nuesa misión, lo único que nos cansó fo la so afición a la ropa verde y azul. Nun había nin señal de Gada, cosa non d’estrañar si cuntamos qu’hai poco la so muyer vivía con él.

Una llamada nel móvil desixía la nuesa presencia na Avenida de l’Arxentina 26, nuna ponte que se vía en plena carretera. Dexamos a Poldo col lloramicar del que pierde l’ánimu  y colamos a tou meter pal llugar. Yá entós, el casu entamaba a nun me prestar dafechu. Les duldes taben dexando pasu a les conclusiones.

 

 

La semirrotonda d’entrada pa la ponte afayábase enllena coches que bloqueaben el pasu a tolos que quisieren pasar. Daquella les llárimes nun me miraben a los güeyos, la indecisión había dellos minutos que me dominaba. Tuvimos de dir hasta la estación de bomberos a aparcar, cola correspondiente vuelta a la ponte caminando. Vimos a dalgún coche oficial de rangu siguir les nueses rodaes, el casu entamaba a salise del tiestu. Una furgoneta de televisión casi arrambla con nós al pasar raspiando l’aire que respirábemos. Aquello cada vez me golía peor que la llimpieza de la Policía Llocal, dalguién moviere los filos pa que’l casu fuere mediáticu y la solución al crime necesitaba d’una fotografía d’importancia. Nun tardé en decatame qu’asina diba ser la cosa, delles autoridades policiales taben de visita ensin ser convidaos a ello, talamente como facíen davezu cuando pretendíen colgase dalguna medalla.

-¿Qué fae tanta condecoración ente la sangre? –pregunté enfurruñáu al personal de la policía de L.luarca.

-La prensa fo la primera en llegar, nun sé cómo s’enteraron del asesinatu, nosotros nun diximos nin mu. ¡Xúrolo! Los xerifontes llegaron más tarde, paez ser que los periodistes los llamaron buscando información. Y yá ve, ta tola brigada criminal d’Uviéu estudiando’l llugar como si supieren el casu de pe a pa.

Estrozaríen el sitiu y nadie nun sedría a pone-y cara. Esa yera la so especialidá. Decatámonos que nenguna mirada se dirixía p’hacia nós, sobrábemos naquel escenariu. Baxo la ponte arrexuntábense más policíes que nuna casa colorinos. Enterámonos d’oyíes qu’apaeciere’l vistiu y la ropa interior de Gada manchaos de sangre y fechos una llaceria. Menos mal que los metieren nes consabides bolses de plásticu que más tarde diríen a dalgún llaboratoriu nel que se contaminaríen por mor de la cantidá de trabayu qu’arrexuntaben. Pasu ente pasu fuimos reculando, la nuesa presencia taba de más. Vimos como un conocedor dafechu del casu garraba a la prensa y montaba una rueda improvisada, falaría del sucesu como si lu investigare de tola vida y aseguraría que la brigada criminal central taba a piques de solucionalo. Yo y Roi teníemoslo mui claro, la ropa atopábase como mui colocao, talamente como si dalguién procurare d’asitiala curioso y llamare darréu a la prensa que s’encargaría de preguntar al circu policial. Roi garróme pel brazu y tiró por min pal coche. La castrona de Gada volvía de nueves a xugámela. Taba claro.

Colamos pal hotel a garrar les maletes que nun nos diere tiempu a desfacer. Na carrapotada d’años que llevaba nel cuerpu deprendiere a claudicar cuando los xerifontes queríen llevase’l méritu, anquen nun hubiere nin tan siquiera crime qu’investigar. Enantes de marchar, teníemos de pasar a salvar a un inocente de les garres de los que siempre teníen la razón.

 

Nesta entrega xunte los capítulos 9 y 10 y el xueves que vien xuntaránse'l 11 y 12. Con ellos va finar el rellatu, pero nun penséis que ta tou solucionáu, yo que vosotros siguiría hasta'l puntu y final, va sorprendevos. Nun quedría acabar ensin dedica-y el rellatu enteru a Maria Pilar Prado Suárez, llectora exemplar y lluchadora de vida, pa ti collacia.

 

.

 

CASUALIDÁ (8)

Plantamos na cai Olavarrieta, na Comisaría de Policía, enantes que’l sol amosare que yera de día. Sicasí, les sos oficines llevaben dello tiempu referviendo: sacaren al xuez de la cama y llograren les ordes de rexistru; los efeutivos de les comisaríes más próximes taben averándose a la de L.luarca p’aidar nel casu; llograron hasta lo que nun pidimos, el conceyal encargáu de la Policía Llocal taba esperándonos pa ponese al nuesu serviciu. Indiqué-y a Roi que tomare nota de la eficiencia d’aquella bona xente pa cuando tornáremos cunta-ylo a los sos compañeros de Xixón. Miróme reviráu, faciendo sonar una lletanía malpenes audible a les mosques y al so xefe.

Teníennos preparáu un despachu nel que nos esperaba’l conceyal. Al entrar, llevantóse de la siella y apurriónos una mano deseosa de combayar.

-Señores, tienen ustedes abiertes les puertes de les nueses dependencies pa lo que faiga falta. Tengo de dici-yos que Poldo ta suspendíu d’emplegu y sueldu mentanto dure la investigación. Nun quiero qu’haiga dulda dala de la nuesa collaboración.

A min nun se me daba mui bien tratar con políticos direutamente, quiciabes por eso nun ascendiere nuna carrapotada d’años. Agradecí-y la so collaboración y pidí-y que fuere con nós hasta les oficines de la Policía Llocal pa ser testigu del rexistru. ¡Qué fatu fui! El llugar golía a llimpiu y nun yera polos productos de llimpieza. Hasta les taquilles s’alcontraben milagrosamente vacíes, nin les arañes pasaren per elles n’hores. La cara de los axentes, firmes delantre’l llugar, reíense militarmente de la nuesa presencia.

-Como ve, los nuesos axentes nun empleguen les taquilles pa nada. Les sos cases tán cerquina y son más cómodes –apuntó’l conceyal cínico.

Roi fízome xestu de contención. Pregunté polos baños pa dir a desafogar la cara de les llárimes que me cayíen tovía por mor de Gada. ¡Qué casualidá! Tamién golía a llimpio. Diéronme ganes de matar a dalguién pero, cosa raro, salí serio y empobiné los mios pasos pal chigre Pilar de la que-y mandaba a Roi siguir col rexistru.

 

El llunes que vien llegará l'alcuentru ente'l comisariu y Poldo. ¿Saldrán rayos y centelles? Esperámoste. Hasta entós, ta llueu.

 

.

CASUALIDÁ (7)

De primeres, na Policia Nacional de L.luarca nun nos miraron con bon güeyu, pero depués de dalguna parrafada de Roi entamaron a falanos de tú a tú y, cuando nos decatamos, taben pidiéndonos ayuda nel casu. Llamáron al nuesu comisariu xefe y esti, después de munchu rezungar, almitió la nuesa participación como asesores. Tomamos declaración al discapacitáu, depués de prauticar un migayín con él en casa Pilar, y diriximos l’interrogatoriu pa onde más nos convenía. Llogramos que s’afitare como un testigu clave nel casu, abriéndonos toles puertes pa investigar oficialmente. Rexistramos la casa de Gada, ablucando xunto a los policies nacionales l.luarquinos col calzoncillu y el retratu, llogrando probar asina la rellación de Poldo cola víctima. Asina tou, había dalgo que nun me pegaba, cómo Poldo nun aprovechare’l tiempu y nun se desficiere de les prebes. Nun yera normal que fuere tan llistu pa unes coses y tan fatu pa otres. Roi, llistu como la fame n’atopar coses, alcontró un llibru nel que figuraba una dedicatoria non esperada. De mano intentó tapámela, pero fo más qu’imposible, naquelles circunstancies yo nun dexaba que se m’escapare nada. El llibru dicía, a espetaperru, que quería a Gada, que yera l’amor de la so vida, y que si patatín y patatán. Coño, y firmábalu l’escritor esi de la novela del picha triste. Esta Gada diba acabar conmigo.

Col reconcomín per dientro min, fuímos pal domiciliu de la familia del testigu, afayáu na avenida de l’Arxentina, llugar onde la desaparecida, la Gada del mio corazón, pasó los últimos momentos enantes desapaecer. Atopamos tola so ropa espardida pel suelu, parte d’ella estrozada a xirones. Buscáronse güelgues per tola casa pero tou parecía indicar que l’asaltu fuere fechu por persona o persones esperimentaes. Descubrióse un pocu sangre que más tarde conocióse la so fonte: les narices de Gada. Sacóse muestres de cuerda que pudo emplegase reduciendo a la víctima y obligándola a marchar con él o ellos. De sópitu, vi una escarapela nun requexín al par de la puerta. Sonóme a dalgo asemeyáu a la dedicatoria del llibru. Traía escrito que yera d’un congresu celebráu en Valencia por parte d’un partíu llamémoslu políticu. Taben dibuxaos corazones a fartar y ponía que yera pa Gada, l’amante de la so vida. Nun traía firma, estos teníen más curiáu. Estrocé dafechu la escarapela, neto a como ella m’esficiere la vida. La mio cabeza mal dixerió too aquello, dexé que Roi s’encargare de tou y salí de la casa a llorar, a que me pingare la razón.

La nueche diba cayendo poro que nos convidaron a cenar. Aprovechamos aquel intre pa poner en común tolo descubiertu hasta entós. Nun dexe que se torciere nada del casu, corrixendo cualquier contradicción y dándo-y puxu a toles pruebes circunstanciales. Cosa distinto yera cómo me sentía yo: fechu una llaceria y nun creyéndome muncho tolo que diba pasando. Envalentonéme, pa que Gada nun m’esmigayare per dientro, y aseguré-yos que Poldo tenía de llevar una vida secreta dende hai muncho. Vamos, que fui un migayín parcial, los celos xugábenme siempre una mala pasada. Roi callare como un afogáu, de xuru qu’alcordándose de los papelos onde-y tenía apuntaes toles picies. Sicasí, no más fondero de min surdía una voz que m’aconseyaba más prudencia, que too aquello rinchaba a estazón. Diome lo mesmo toles alarmes que sonaben na mio cabaza, siguí p’alantre escapando del dolor. Mandé que fueren al xulgáu l.luarquín a pidir una orde de rexistru de la casa de Poldo y de la Policía Llocal malpenes abrieren les puertes xudiciales. Había qu’urxi-y al xuez por mor de la posible destrucción de prebes. Llamaríen a la central pa pidir efeutivos cola sida d’entamar, a nun más tardar, la búsqueda del cuerpo de la víctima, yá que nun había munchu enfotu en que tuviere viva. Ellos tomaron nota de les sos xeres, nun s’escaeciendo de nada, sobre tou col empixe que teníen de tener un casu de resonancia estatal.

En marchando del restaurante, Roi díxome dalgo d’un bar de llucecines que, casualmente, quedaba de camín del hotel que nos reservaren. Nun fizo falta que m’esgañitare, la mio cara dexólu empapiroláu. En llegando al hotel, dos maletes nos esperaben con tolo que necesitábemos, la xente la comisaría portábase. Garramos les llaves y fuimos pa la cama, el día diba entamar primero que pa les pites.

 

El xueves que vien los nuesos protagonistes van vésela cola Policía Llocal de L.luarca. ¿Habrá amor o guerra? Nun te lo pierdas. Hasta entós, ta llueu.


.

CASUALIDÁ (6)

Acabamos tomando unes cervecines nel chigre Pilar, cerquina la Policia Llocal, onde nun gorgutamos pallabra, nin nos mirábemos l’ún al otru. Poldo parónos los pies dafechu, recordónos que nun teníemos casu qu’investigar y que tábemos faciendo’l babayu más absolutu. Ensin que nos decatáremos, averóse un paisanu que coxicaba.

-¿Los señores policíes, imaxino? –el nuesu xestu dexó-y claro qu’asina yera-. Soi amigu de Gada y tengo de cuntá-yos dalgo d’ella. Hai dos díes que vino a la mio casa toa esmolecida por mor del so amante.

-¿Ún tal Poldo, quiciabes? –pregunté-y too de siguío.

Notóse-y un migayín de plasmu ante la rapidez del aciertu col nome. Dalgo reburdió con respeutu a un avisu que-y dieren de la nuesa llegada, pero díxolo con tanta rapidez que nun fuimos a entendé-ylo. Pidió una cerveza y dixo que la punxeren a la nuesa cuenta; a Roi nun-y prestó muncho tantes confiances. Tornó cola so predicazaña, enllenándola de fataes y requilorios, anque ente tanta paya había dalgo granible qu’aclaraba a medies lo que pasare. El día la cicloxénesis esplosiva , tres la grabación involuntaria de la televisión, Gada fuxó a les carreres. Fo parada por Poldo que-y desixó encabritáu siguir con él. Ella respondió-y que primero tenía de dexar a la so muyer, mentanto tuviere con ella, nun tenía d’esperar que moviere ficha. Poldo fízo-y un xestu de corta-y el percuezu y enfiló alteriáu pa la comisaría. Acordies el discapacitáu lo cuntaba, veníenme imáxenes del pasáu, alcordances de dalgo que pudo ser y nun fue pola mio cobardía. L’home falaba y falaba, dicía que Gada nun tornó a casa, que se sentía mui nerviosa y fo xunto a él pa pidi-y  ayuda. Llevóla a un domiciliu familiar que tenía na avenida l’Arxentina. Una vez ellí, pidió-y que-y fuere a pola ropa, cosa que fizo encantáu. Garró tolo que-y entraba en dos maletes y metióles nel coche adautáu que tenía p’andar por L.luarca. Non contenta cola ropa, mandólu a polos cuadros. Él negóse de mano, considerábalo una fatada, pa qué quedría dalguién cuadros de Poldo en porriques. El vendaval de Gada nun lo dexó dicir non nin tres veces. Marchó a por ellos y al volver nun había nin rastro d’ella. Roi punxo la mano nel mio costazu, pero los mios sentimientos facía segundos que s’esmoronaren.

Naquel intre sonóme’l móvil, yera’l comisariu xefe falándome d’una protesta de la Policía Llocal de L.luarca. Apuréme a cunta-y que teníemos un testigu que dicía que’l policía llocal, que respondía al nome de Poldo, tenía muncho que desplicar na desapaición d’una afamada pintora del llugar. Berróme dalgo asina como que les competencies en L.luarca teníales la Policía Nacional de la villa. Mentí-y al cunta-y que l’home llamárenos a nós, tenía mieu a les represalies qu’habría en L.luarca al señalar a un axente de la llei de la llocalidá. Aseló, mandónos dir d’inmediatu a la comisaría l.luarquina y desplicar dafechu tou. Colgó ensin dexame contesta-y. Nel mio interior dalgo me dicía qu’esti que vos fala taba tomando munches prieses, que’l casu taba llevándome a min en cuentes de yo a él.

 

NUN TE PIERDAS L'ALCUENTRU DEL COMISARIU Y ROI COLA POLICIA NACIONAL DE L.LUARCA EL LLUNES QUE VIEN. HASTA ENTÓS, TA LLUEU.


.

CASUALIDÁ (5)

Esta vez, la entrada en L.luarca fo pel centru, col problema qu’eso supuso p’aparcar, les sos cais taben feches pa caminar más que pa dexar los coches. Roi buscó nel so móvil les señes de la Policía Llocal. La cai onde taba tenía nome mui de paisana de pueblu, cai Pilarín, y alcontrábase cerquina l’ayuntamientu. La nuesa caminada terminó nel parquín onde Roi aseguraba tener corríos abondos San Timoteos, enderechamos pa la ponte que travesaba’l ríu y ehí atopamos la cai Pilarín. Desiguida vimos el cartelu que dicía Policía Llocal. Nun duldamos nin un rispiu en dar los calcaños como llocos, abrir la puerta de la comisaría y entrar. De mano, tol mundiu se nos quedó mirando, la nuesa entrada taba lloñe de ser discreta. Un policía llocal averósenos y preguntónos qué deseábemos. El mui castrón yera Poldo.

-Hola, buenes. Somos de la Policía Nacional, llamámoslos por mor d’una muyer que llevaba yá dalgún tiempu desapaecida en Xixón. ¿Nun-y suena? –espetó-y Roi en viéndolu.

-Non, non… Lo meyor ye que falen col nuesu xefe. Esperen, voi llamalu –contestó’l mui fuín, sacándome l’enraxone de dientro.

-Ye con usté col que queremos falar, Poldo –espeté-y yo. Malpenes vio que-y sabíemos el nome, púnxose nerviosu-. Usté fo quien l’aviso de la nuesa llegada –Roi chascó la llingua fadiáu poles mios prieses. Paré l’ataque qu’entamare y esperé mansulín a que Roi lo arreglare.

Poldo mirónos raro y mandónos enseñá-y la documentación. Amosámos-y les plaques. El mio subordináu decatóse que nun tenía nada que facer, el mio mal carauter dominóme, díxe-y al guaperes lo mal que-y pintaba l’asuntu si siguía sofitando a Gada. El galán de fotonovela enraxonóse y sacó la llingua a pastiar. Aseguró que Gada yera una llunática que dicía dedicase a la pintura y que quería face-y un retratu costare lo que costare. El mui xabaz intentaba d’echa-y toles culpes a ella, mialma que peazu paisanu. Continuó la so predicazaña diciendo que de mano nun se dexó engatusar por aquella lloca, pero después almitió tenese retratao pa quitásela d’encima. Lo de lloca, entá m’encabritó más. Pregunté-y cómo se pintaba esnudu a dalguién que nun se conocía, a lo que me contestó qu’él yera naturista poro que nun-y daba importancia a esa babayada. ¡Naturista! Lo que yera nun lo voi dicir equí, quedaría mal. Los calzoncillos tampoco fueron a sacalu de les sos casielles, dicía que sabía que tuviere de ser ella la que los garrare, quitáralos nuna sesión de posáu y después nun apaecíen per dengún llau. Taba seguru qu’aquel día los punxere, anque ella asegurare que venía de la playa ensin ellos.

-Señor Poldo, nun sabe usté a qué ta xugando. Dalguién d’esta comisaría avisó a Gada del nuesu interés nella y usté sal como favoritu.

-Los que nun saben a qué tan xugando son ustedes. Nun sé ónde ta esa señora, nin m’importa. Ye más, si nun apaez enxamás nun me va preocupar nin ún rispiu. Y agora, si nun tienen más de dicime, tengo de siguir col mio trabayu.

Dio media vuelta y dexónos de buenes a primeres. Tenía bien deprendida la lleición, nun-y díbemos sacar nada d’onde s’atopaba Gada. Lo que nun m’entraba na cabeza yera porqué ella fuxía d’esi mou de min.

 

NUN ESCAEZAS EL XUEVES QUE VIEN LLEER EL NUEVU CAPÍTULU, DALGO ABLUCANTE SE VA DESCUBRIR. HASTA ENTÓS, TA LLUEU.

 

.

CASUALIDÁ (4)

Al día siguiente, llegué a Comisaría entá dormíu, saqué un café de la máquina y nun-y eché azúcar pa ver si m’espertaba tol amarguxu que me dexare la vida. Noté que dalguién me facía señes, miré pa la zona y nun fui a ver quién yera. Al entrar nel despachu, salióme al paso Roi que traía una llista na mano.

-Tuvo d’avisala dalguién de la policía llocal. Yeren los únicos que sabíen del nuesu interés por ella. Mire –señaló pa la llista-, tuvo de ser ella. Fo cola que falé, la Palmira de los coyones, y encima vive cerquina de Gada.

Vaya si taba enquivocáu el rellistu de Roi, por muncho que señalare pa Palmira, a min nun se me diba la vista d’otru nome qu’apaecía ellí, Poldu.

-Fo él –espeté-y de primeres.

-¡Home! Nun sabía yo de los sos dotes d’aldovinación, xefe.

Como nun me diba creyer, enseñé-y les semeyes que saqué col móvil al cuadru y los calzoncillos. Enfurruñóse porque nun-ylo dixere nel momentu, pero ún tenía la so intimidá bien guardada y nun yera fácil amosala. Fo respetuosu colos sos comentarios, cosa que nun esperaba d’un chisgarabís como él, hasta me dio una palmadina na espalda en señal de solidaridá. Ofrecióse a llevame de nueves a L.luarca nel so coche, garró les plaques falses que poníemos nos autos pa conducilos a toa mecha y dexó recáu de que díbemos investigar una pista del casu en que tábemos. Nun había dulda dala, Roi taba en tou, mialma que descubrí la persona más cabal que trabayaba pa min, anque-y faltare un migayín de posu.

 Nun t'escaezas el llunes que vien de lleer el capítulu siguiente, paso llista. Hasta entós, ta llueu.

.

CASUALIDÁ (3-2)

Siguimos la caminada per aquel cuestón p’abaxo. De xemes en cuando, sentía dalguna risuca de Roi que me contaxaba. La folixa enxamás nun lu desconcentró del so llabor, el mui xixilistrón apuntó mui enchipáu pa una casa na que se vía una plaquina col númberu 13. Tenía’l tastu de les viviendes d’aldega, piquiñina y con dos pisos apetiguñaos. Nun se vía lluz prendío nel so interior. Sicasí, la puerta alcontrábase abierta de par en par. Tenía tola pinta que dalguién tuviere o taba escargatiando  ente les coses de valir. Roi sacó la pistola y averóse a la entrada. Fízome xestos pa que fuere tres d’él. Obedecílu y pasé pa dientro. Apalpuñé la gabardina en busca d’una llinterna que nos allumbrare la búsqueda. Tando nello, el perfume de Gada inundó a espetaperru les mios ñarres. Col azoramientu que m’entró, cayóme la llinterna del bolsu la gabardina, posóse en suelu montando un estrueldu descomanáu y gracies a que Roi la garro, con cara furruñu, el ruíu amatagóse. Pasemos cuartu a cuartu per tola primer planta. El mio subalternu señalóme les escaleres. El que vos fala movió la cabeza p’arriba y p’abaxo en señal afirmativa, anque namái fuere un movimientu reflexu. Fuímos, pasu ente pasu, xubiendo aquellos escalones irregulares. Nun s’oyía más que silenciu. Finamos el recorríu ensin dar con una sola persona, la casa atopábase como dexada a les carreres.

-Xefe, tome unos guantes y póngaselos.

-¿Pa qué, ho?

-Ta fatu, nun quedrá dexar les sos güelgues per tola casa.

Sí, taba fatu; nun sabía bien qué facer, Gada descolocárame col so arrecendor y nun me dexaba pensar tranquilu. Entré nel que paecía’l so cuartu buscando dalgo del nuesu pasáu. L’armariu y el comodín presentábense coles puertes y caxones revolucionaos. Dalguién s’encargare de vacialos a toa mecha. Faltaben la mayoría les prendes pero, y esa yera la mio impresión, taben garraes toes al bon tuntún. Ente’l revoltixu abandonáu, alcontré un calzoncillu de rayes verdes y azules perteneciente a dalguién que nun yera yo. Referví per dientro; aquello, anque lo pensare, nun  lo esperaba. Golílu en busca de rastros que me mortificaren, la so piel tuviere tocándolu, retozando al so par, espardiendo’l so amor como nun había muncho ficiere colos míos. Teníen un nome cosido na parte d’atrás, Poldo. Gada nun ponía’l nome de los amantes nos calzoncillos, tuviere de ser la muyer d’aquel perru, la otra engañada nel cuartetu.

-Xefe, xefe, tenemos de marchar –glayóme Roi-. Tamos teniendo muncha suerte de que naide nun nos pillare. Equí nun hai nada d’importancia.

Dexé los calzoncillos nel caxón del comodín de la que salíemos del cuartu. Fo entós cuando vi’l cuadru. Gada siempre pintaba a los sos amantes y naquel punxere munchu procuru, fotografiare aquellos güeyos azules calcando dafechu la so mirada gañina. Fo al velu cuando tuve seguru que la perdiere pa siempre. Saqué col móvil una semeya al cuadru y, después, dos más a los envidiosos calzoncillos; tres d’ello, fuxí del llugar con rabia. El subalternu taba esperándome a la puerta tou intranquilu, viendo como perdía la poca chapeta que me quedaba. Anque tovía me sobrare tiempu pa decatame qu’aquello paecía talamente’l decoráu d’una obra teatru costumbrista.

El xueves que vien siguira p'alantre esta historia qu'espero vos te prestando. Hasta entós, ta llueu.

.

CASUALIDÁ (3-1)

Llegamos a L.luarca pela zona de Vil.lar, aparcamos el coche arrecoyíu pela nueche y emplegamos el movil de Roi pa ser a dar cola cai de marres.

-¡Lo que me faltaba! ¡Anda que nun hai desniveles nesta villa! Mialma que’l to móvil tien de ser cenizu.

-Non, si al final voi ser yo’l que-y punxe una pistola na cabeza y lu obligué a venir.

-Mire Roi, a veces ye usté un cafiante de primera. Nun se-y pue dicir nada.

-Ande, tire p’abaxo, que tien suerte que nun lu metiere pel centru. Diba quedar ensin aliendu colo pindio que ye aquello.

Entamamos el camín  hasta la cai Calvariu dientro d’un silenciu al que nun tábemos acostumaos. Naquella villa, a les hores que llegáremos, nun salíen nin les curuxes a dar un paseucu. Desiguida se-y perdió la vista a Roi pente aquellos ablucantes paisaxes que nos arrodiaben. Faló y faló de toles maravíes, del espectáculu de la mar allá abaxones, de les cases poles que pasábemos,… y nun lu dexé más porque-y gruñí como un marranu enantes que me volviere llocu cola so charranería. De sópitu, atopamos al serenu del pueblu faciendo equilibrios de la que sacaba la llave pa entrar en casa.

-¿Nun tendrán…nun tendrán… un piiiiiiitu?

-Nun fumamos –contesté-y enantes d’armala bien armada-. ¿Sabe si ta mui lloñe’l númberu 13?

-Nun… nun… s’esmo… esmoleza,… acom… acompáñarelos, ¡hip!

Yo yera famosu por montar llaceries pero Roi yeralo por iguales, movíase de mieu per ente elles. Averóse al home y tuvo falando con él un cachín. El balancín tartamiellu entamó a mirame desconfiáu de la que marmuraba qu’a él nun lu ganaba naide a gallu. Averóme la so boca etílica a les ñarres y echóme un taragañu de curiáu. Empezó a dicir qu’a la so muyer nun-y ponía la mano enriba naide, que pa eso taba’l so maríu. Esti que vos fala nun paraba de dar glayíos cuando aquel refervíu d’alcohol me garró peles partes. Nun supe bien cómo pero di-y un bon manotazu que lu llanzó al suelu. Punxe una cara de diañu enfurruñáu que fizo qu’aquel alambique con pates entamare una escorribanda consigo mesmo cai abaxo.

-Contigo yá falare, castrón. Les tos bromes tán fuera llugar en dalgunes ocasiones… –tuvimos unos segundinos callaos cuando noté que l’enraxone me diba pasando mansulino-. Val, nun me mires asina, perdónote. Sí tienen gracia. Ye más, d’esta vamos alcordanos y riíla a más nun poder per meses.

-Calle y siga, qu’ési nun va tirase más a usté per güei.

GRACIES POL VUESU SIGUIMIENTU. EL LLUNES QUE VIEN TAREMOS DE NUEVES EQUÍ, COLA SEGUNDA PARTE DEL CAPÍTULU 3 D'ESTI RELLATU CURTIU. HASTA ENTÓS, TA LLUEU.


.

CASUALIDÁ (2)

Llevaba tiempu sentáu nel mio despachu, cavilgando cómo dexare escapar a Gada, la muyer que coneutare conmigo a la perfeición, que tenía hasta’l  mesmo mal temperamentu, cuando entró Roi con un papelucu ente los deos que retorcía de contino. Faló con determín de la que yo volvía en min.

-Tien de prometeme romper tolos informes de les mios fataes y apúrro-y esti papelín pol que tanto allampia.

-Roi, nun minutu voi poneme a rompe-y les piernes y da-yles con pataquines a los perros de la comisaría.

-Nun se ponga tan gafu, ho. Equí tien el papelucu, tou pa usté.

La fueyuca dicía: cai Calvariu 13. Paecía premonitoria de la llaceria que diba asoceder. Mandé-y a Roi  que se preparare pa salir hacia L.luarca, quería  tomar un primer contautu cola casa de Gada. El mio subalternu, a sabiendes de que nel fondu lo que deseaba yera volver vela, punxo cara de pexiguera y negóse testeronamente a cumplir la orde. Reculó acobardáu p’hacia la so mesa mentato cayía de brucies en suelu. Miróme axorizáu de la que-y sacaba del caxón les fueyes de picies, ximielgándoles d’una mena prudente y remembrándo-y que tovía nun les tirare a la papelera. Siguió nes sos trece, asina que nun tuve otra que garrálu pel pescuezu y apretalu sele pa convencelu de facer lo correutu, que yera obedecer al so xefe. ¡Mialma que me saliere teatreru! Entamó a facer esparabanes  ya intentar glayar socorru pa que s’enterare media comisaría. Soltélu con tal de que nun diere la nota, di-y unes palmaduques nel costazu hasta llograr que volviere a respirar con normalidá y fice-y ver que la so muyer taba amosquiada con tanta guardía nocherniega. Nomar a la so muyer fo mano santu, cambió la so predisposición a tou meter, amosando la so voluntá d’acompañame naquella investigación un migayín atípica.

 

Gracies a toos pola gran acoyida que-y dísteis a la primer entrega del rellatu curtiu. Dalgunos pidíen que s'espublizare más de siguío, una vez a la selmana abultába-yos miu llarga la espera. Les vueses órdenes son deseyos y los deseyos hai de cumplilos. El xueves que vien espublizaráse la primer parte del tercer capítulu, que se fairá en dos veces pol so llargor. Hasta entós, ta llueu.

 

.

CASUALIDÁ (1)

Atapecía igual qu’otros díes de la mio estrozada esistencia: tres el cansu trabayu na comisaría, diba pal chigre de baxo casa a cenar y, n’acabando, xubía a descansar un migayín enantes de colar pa los pubs colos neones de colorinos. En casa, prendía la televisión col aquello de finxir escuchar les noticies, tumbábame  en sofá y dexaba los güeyos perdíos na pantalla. Aquel día nun pudo ser asina, una alloriante visión fizo que me blincaren toles neurones aínda non dormíes, nun yera a creyelo, na pantalla de plasma apaecía ella col so inequívocu mirar de mandu. Ente imáxenes d’una cicloxénesis esplosiva en L.luarca, mecida cola traxedia, apaecía’l mayor fracasu de la mio vida, Gada. La so sorrisa fulera percorría foles xigantes, llocales inundaos, barcos lluchando pola so vida,…, destrucción mirares onde mirares. Aquel desastre trúxome alcordances de cuando ella m’abandonare ensin esplicación dala, dexando a les clares lo poco que-y importaba. Acabó col mio matrimoniu d’años, fízome perder el cariñu de los fíos, consiguió que descuidare’l trabayu y llogró que me sintiere como una llaceria absoluta, nun se podía pidir más, la so eficiencia taba demostrada. Por embargu, entá la quería, prestábame aquella rellación de dominiu, de pasión ensin tregua. Sé que me pidió de siguío que me divorciare y fuere vivir con ella. Sé que-y prometí que lo diba pensar. Sé que tuve dándo-y llargues tres años. Pero nun yera pa ponese asina. Tolo tomaba pola tremenda.

Garré’l móvil y llamé a la comisaría. Púnxose Roi, l’home que facía más guardies que la cabra la lexón, y mandé-y que me buscare les señes de Gada en L.luarca. El mio subalternu púnxose gallu y reburdió tolo que quisó. Actuaba siempre igual, namái había una forma cortalu y púnxela en práutica. Glayé-y como un berriacu talamente como-yos facía a los deteníos. Nun m’esperaba la so rempuesta, fo un golpe baxu.

-Comisariu, alcuérdese de la cabera vez, dexólu tan esgonciáu que casi lu echen.

-Vete fastidiar a otru, nin. Soi’l to superior y toi dándote una orde. La moralina déxesla pa cuando tes coles tos pilforrones de guardia.

-Nun tenga mieu, asina lo faeré. Al fin de cuentes, ye a usté a quien van espedientar.

-¡Van espedientate a ti! ¿Y aldovines quién va ser l’autor?

Nun tuvo rempuesta posible a aquella amenaza. Sabía que yo tenía apuntaes les picies de caún de la comisaría, nun fuere a necesitales pa dalguna urxencia. Colgó escopetáu’l teléfonu, imaxiné que pa realizar el mandáu a tou meter. Apagué’l televisor y baxé a tomar unes copes nos llugares davezu.

El llunes que vien va a siguir esti rellatu afondando en toles lluces y solombres d'esti casu tan raru. Nun lo seyas a perder, espérote equí, en NON, el to blog más lliterariu. Hasta entós.

.

RUTINA

El día nun entama sinón entro nel café de Cloyu a tomar l’almuerzu de costume. Namái trespasar les puertes, garró’l periódicu’l día pa da-y un repasu que lu dexo tremando. ¡Coime! La portada de güei ye morrocotuda: Fíu drogadictu mata a so padre. ¡Aimimamina, probe paisanu! Sé lo que ye eso. Teníalo en casa. Nun paró hasta llograr frayar el mio matrimoniu. A la muyer dába-y pena y yo nun yera a aguantalu. Tuve de colar de casa y poneme a vivir solu na otra esquina la ciudá pa que me dexare tranquilu. ¡Mira que la folixa d’ayeri nueche dexó un migayín turulatu a Cloyu! Normalmente nun tarda nin un suspiru en traeme’l café colos churros. ¡Home! Ehí llega Xandru. ¡Qué raro, nun se punxo al mio llau! Y Cloyo va pone-y  el café enantes que lo mio. Nin que fuere tresparente. Pa enriba, pasa pel mio llau y nin me mira. Ye como si tuviere muertu.

.

LA MAR SELE

El perfil de la lluna entama esclariase nel descomanáu cielu la mar. La nueche trabayosa danos un descansu nel nuesu barquín de pesca. Pasin a pasu tornamos onde los seres s’alimenten de ruíu. Güei la mar ta sele, mui sele, dexándose querer na despedida diaria que tenemos con ella. Prendo un pitu que m’aconseya dexalo meyor mañana. Les vidayes oblíguenme zarrar los güeyos pa da-y una fondera calada a la vida. Suaño; suaño cola llegada de la tranquilidá qu’hai tiempu nos arrampuñaron aquellos que viven de quitánosla. De sópitu, una lluz cafiante bailla no fondero l’horizonte, como a la busca d’un puntu onde fixase. Aduéñase de la paz que fai rebleguinos al amanecerín la mar, mátala col so pexigueru dir y venir. Cada vez ta más cerca de nós, más aforfugante na fola de la xusticia. Ensin avisu, para la so búsqueda. Les sirenes afueguen el silenciu la verdá. Garró una presa que va ser difícil que la suelte. La lluz espetósela escontra un barquín atarraquitáu xente de piel claro como la lluna. Emprincipien a llanzase al agua colos sos pelos roxos, rubios, castaños claro…, cola desesperación del que sabe que nun va alcanzar tierra.  Va pa tres años que se declaró la guerra na mar del norte y nun paren de llegar.

.

PENSAMIENTOS D’UN GATU

Nun soi a evitalo. Tres una comida abondoso, suelo estirame y estirame tou galbanosu la tira veces. Demientres los collacios de camada entamen una ablucante siesta d’hores, yo echo la primera en llambeme les pates y separtar tolo posible les unes de les otres. Ye un vezu como otru cualquiera. ¡Qué-y voi facer! Yá sé que después nun me queda otra que chucame endemasiáu averáu a los güesos. ¡Colo dolioso qu’eso ye! Agora que los miro, cuido que yá queda poca carne n’ellos. Nun tendremos otra que marchar de nueves de casa, colo que me cuesta a min los cambios. Sobre tou tener d’avezame a una nueva ama. ¡Colo mimosón que soi! Tardo muncho n’escaecer les caricies vieyes y acostumame a les nueves. Menos mal que los collacios compréndenme bien y déxenme pega-y el primer taragañu. Siempre suelo entamar pela carne’l pescuezu, paezme la más sabrosona.

Quiero dedica-y esti primer microrrellatu del blog a Nor, amigu de lo góticu y de tolo negro. Espero que te preste.

Entamo de nueves esti blog con novedaes qu'espero prestoses. Nun tendrá periodicidá sinón que saldrá cuando acabe d'escribir dalgo. Amás de les sensaciones y los mecigayos sumaránse los microrrellatos, les flash-fiction, los poemes... asina como cualquier idega qu'apaeza pel camín. Saludos y al tayu.


.

MENSAXE DEL AIRE’L NORTE

 

L’aire’l norte desíxeme volar sele p’hacia la tierra de la conciencia y unviar un mensaxe a los asturianos que diz: “Qué fatos somos”.

 

 

.