18/4/16

AMOR






Ensuchu árbol maurientu

que fuxes d’una soledá

allargada pola airada.

¡Nun yes a oyer al ríu romper el silenciu!

¡Nin yes a sentir l’orbayu baxate pel tueru!

¡Nin yes a dexar al agua allegase

y xugar col sele

p

i

n      p

g      i

o      n      p

        g      i

        o      n      p

                g      i

                o      n      p

                        g      i

                        o      n      p

                               g      i

                               o      n      p

                                       g      i

                                       o      n

                                               g

                                               o!

Siente los raigaños facete veyures,

que l’agua percorra les fueyes y

baxe pel alma dibuxando deseos,

que la vida tasque la muerte

d’un cuerpu dexáu d’afeutu,

que torne esa mirada duecha

enllena de borrachina tenrura,

que la salvia inunde los sentimientos

d’un auténticu amor.


El llunes 2 de mayu, a les 9 la mañana, espublizaráse otra flash fiction de la serie Payares entitulada El Club los Funcionarios Muertos. Hasta entós, ta llueu.


.

4/4/16

INVISIBLE


Hai yá bien de tiempu que nun falo de sensación cuando me refiero a la seguranza de que dalgunes veces soi invisible. Nun sé cómo funciona’l superpoder, cuido que talamente como les foles que vienen y van, pero tenía les biblioteques de la rodiada tremando coles mios llargues visites en busca llibros que trataren de la tema.

La primer vez que sentí’l don atopábame nuna de tantes cenes familiares poles fiestes del pueblu. Na casa, neses ocasiones, poníense dos meses pa que fuéremos a coyer la recua familia que yéremos: nuna grandona plantábense los mayores y n’otra piquiñina los nenos. Tando nel intre de sentase a elles, un retorciyón obligóme arrear como un condenáu pal bater. En volviendo, decatéme que nun tenía sitiu onde allugame. Pregunté a unos y otros ensin rempuesta dala. Vi como los platos diben pasando de la que me sonaben les tripes. Hasta los perros se poníen les botes delantre min. Cuando se llevantaron toos, decatéme que naide nun me dirixía la mirada. Salí berrando puerta p’alantre y nun volví hasta bien entrada la nueche. Mio madre, toa preocupada, esperábame na cocina. Pidióme que-y desplicare la mio ausencia. Cunté-y la que m’armaren tou enfocicáu. Riose y riose de la que me dicía si yá volviere picar les madalenes de chicolate de mio güelu. Riñóme serio por garrar de la cocina les llambiotaes de los mayores. A lo que se vía, los nenos nun tábemos preparaos pa xintar dalgunes coses qu’ella verbalizó como allucinantes. Diome un chuchu, mandóme chucame y dixo que pela mañana diba pidi-y perdón a la vecina. Albidro qu’aquel día y aquelles madalenes allucinantes espertaron esti don qu’hai en mi.

El don fue n’aumentu ensin falta yá de dengún elementu allucinante. Estudié nun d’esos colexos privaos con comilles monetaries. La dexadez cola que me trataben taba acordies a la poca importancia d’apellíos. Yera mui bon estudiante, sicasí les notes nun superaben enxamás a los mios copiones de pupitre, gracies a la eficaz llabor tutorial que gastaben coles families de ringurrangu. Ente les munches anéudotes que vos podía cuntar, onde’l don facía actu presencia, tuvo la del día que me castigaren por asegurar que la redaición presentada a un premiu escolar nun la copiare del inefable apellíu de clas. Mandárenme dir el sábadu pela mañana a aidar en misa pol aquello que Dios m’endrechare na soberbia que me dominaba. Al llegar, el cura desplicóme tolos mandaos que tenía de facer y dexó la ilesia baxo la mio supervisión. Mansulino, entraron les fervoroses a rezar el rosariu na sacristía. Ente recáu y recáu, pasé ente elles ensin que llevantaren cabeza, amuesa clara de la mio invisibilidá. Camenté que yera bon momentu pa repartir los bienes de la ilesia ente aquella xente de valir. Fui metiendo toles ayalgues sacres nos bolsos de tan nobles rezadores. Dexé pal final el más aparente, el de la güela del ganador del concursu lliterariu escolar. Enllenélu de reliquies a embute enantes de salir a finar les xeres. Al empezar misa, les piadoses dames garraron les sos pertenencies y pasaron a los primeros bancos, reservaos pa elles pol espíritu santu. Di-y con ganes a la campanilla onde debía y non de la santa misa. Púnxe-y dello vinagre al vinu benditu que namái pimplaba’l cura. Asitié nel atril el llibru de les Santes Escritures, col aquello de que quedare pámpana abaxo y coles páxines a lleer doblaes un migayín. La vistimienta’l cura amosó dalguna qu’otra mancha de chorizu na espalda. ¡Ah, escaecíaseme! Llamé a la policía pa denunciar el robu de los oxetos de valor de tan sacros llugares. Fo un día pa nun olvidar.

Sicasí, denguna de les aventures que corrí cola invisibilidá tien comparanza con esta última. A la muerte de mio güelu Payares, l’especialista en madalenes, dexó bien dividíes toles propidaes ente la so caterma. A toos-yos dio dalgo que meyorare’l so pecuñu, curiando qu’a min me tocare aquello pa lo que nun mirare nin l’estáu: l’horru. La risión tovía dura hasta agora, anque dengún d’ellos pensó que me sirviere pa tanto. Nel pasar de los años, la ca conceyu mandó catalogar tolos horros col aquello de cobra-yos el famosu IBI. Pa ello mandaren a una empresa amiga, pol aquello que lo privao funcionaba meyor que lo público, esmerase dafechu naquella xera. Cualquier sortéu de la llotería yera más xustu que la forma d’axudicar d’aquellos zotes. Los que nun tuvieren en pueblu más propiedaes al so nome nun yeren merecedores d’horru dengún, poro que-ylu daben a la casa que tuviere al llau. Y esi fo’l mio casu. Entamé toles xestiones pa que se me reconociere la titularidá pero, como enxamás tuvieren oficializaos, nun había dengún papel qu’asegurare que l’horru fuere de la mio familia. Enraxonáronme tanto, que decidí dir pola tremenda. Garré la escopeta de mio güelu, qu’arrampuñare a un primu que-y tocare la meyor casa, metíla nuna bolsa, garrada nos paxos del güertu más productivu, y colé pa les oficines del censu. Al llegar, saqué l’arma y aseguréme que naide nun me viere. Nun había dulda dala, yera invisible. Entamé a glayar y a disparar los cartuchos de salva. Un guardia de seguridá, que de xuru tenía dalguna mirada de rayos escontra la invisibilidá, apuntóme cola pistola pela espalda y mandóme tirame en suelu. Pensé que polo menos apaecería en tola prensa col casu l’horru ya iguaríase. Nada más lloñe de la realidá, esi día hubo dellos ataques sincronizaos de los llocos del turbante en capitales europees y los medios de comunicación nun falaben d’otra cosa.

Agora toi nuna cárcele de másima seguridá, onde atopo que los guardies, neto al de seguridá del censu, tienen de tener un inhibidor que me fae imposible ser invisible pa ellos. Eso dame la seguranza de nun ser l’únicu cola capacidá d’invisivilidá, asina que voi buscar como un llocu a toos ellos. Seguru que dalgún tien de dominar el don.




El llunes 18 d'abril, a les 9 la mañana, espublizaráse otra entrada d'esti blog. Trátase d'una nueva triloxía poética baxo l'epígrafe de Amor-Desamor-Sexu y, acertasti, entamaremos cola entitulada Amor. Hasta entós, ta llueu.


.